Менчука не пусцілі ў аўтобус па электронным квітку

Работнікі сталічных аўтавакзалаў не ведаюць пра куплю квіткоў праз інтэрнэт.

Пра гэта сайту charter97.org паведаміў чытач Юрый.

«30 красавіка, ведаючы, што заўтра паеду на дачу з цяжкай торбай, вырашыў апрабаваць набыццё квітка на аўтобус праз сайт ticketbus.by, каб не стаяць у чарзе. З купляй праблем не ўзнікла. На сайце было напісана: «Пры адпраўленні з аўтавакзалаў Менска пасажыры, якія аплацілі электронныя праязныя квіткі, могуць зрабіць пасадку ў аўтобус і праезд без афармлення праязных квіткоў на папяровым носьбіце». Таму я не стаў раздрукоўваць электронны квіток, але на ўсялякі выпадак захаваў яго ў смартфоне», - адзначыў ён.

Па словах менчука, пры пасадцы ён паказаў кіроўцу квіток у тэлефоне.

«Але той сказаў, маўляў, для мяне гэта не квіток, а падобных ён сотню намалюе. Па заканчэнні праверкі пасажыраў мне было прапанавана ісці за ім з цяжкай торбай і перфаратарам. Прайшлі з ім у дыспетчарскую, дзе зноў спатрэбілася тлумачыць, што і як. Далей з дыспетчарам давялося ісці да кас і там вырашаць пытанне», - дадаў Юрый.

Чытач сказаў, што ў выніку квіток быў раздрукаваны і ўсё ж ён паспеў на рэйс.

«Добра, што я прыйшоў за 10 хвілін да ад'езду аўтобуса, таму што наступны рэйс быў толькі ўвечары. Ні кіроўца, ні дыспетчар, ні касір не інфармаваныя аб электронных квітках. Пры зносінах па тэлефоне з прадстаўніком сайта ticketbus.by высветлілася, што яны толькі аказваюць паслугі па продажы, а астатняе не іх клопат», - сказаў на заканчэнне ён.

Варта адзначыць, што раней неаднаразова паведамлялася пра праблемы з электроннымі квіткамі на цягнік, набытымі на сайце Беларускай чыгункі.