Кыргызстан адкладае ўступленне ў МС
15- 7.05.2014, 18:26
- 20,465
Урад Кыргызстана імкнецца адкласці ўступленне ў Мытны саюз пад кіраўніцтвам Расеі.
Пра гэта заявіў прэм'ер-міністр краіны Джаамарт Атарбаеў, паведамляе «Радыё Свабода».
Сёння ў Бішкеку ён паведаміў, што кіргізская дэлегацыя на чале з намеснікам міністра эканомікі Данілам Ібраевым цяпер знаходзіцца ў Маскве і ладзіць перамовы з расейскім урадам аб магчымасці адкладання ўступленне Кыргызстана ў Мытны саюз на адзін год.
Атарбаеў дадаў, што план уступлення Кыргызстана ў Мытны саюз яшчэ не гатовы. Са слоў прэм'ера, ён будзе падрыхтаваны ўрадам бліжэйшым часам і выстаўлены на публічнае абмеркаванне.
Таксама ён адзначыў, што як толькі план будзе ўхвалены кіргізскім народам і ўрадам, яго дашлюць на зацвярджэнне дзяржавам-сябрам Мытнага саюза - Расеі, Казахстану і Беларусі.
Раней Атарбаеў заяўляў, што далучэнне да Мытнага саюза пад кіраўніцтвам Расеі з'яўляецца «правільным крокам» для яго краіны і дапаможа развязаць многія эканамічныя і сацыяльныя праблемы.
Кіраўнікі Расеі спадзяваліся, што да 2015 года ў выніку далучэння былых савецкіх рэспублік Мытны саюз стане Еўразійскай эканамічнай прасторай на ўзор ЕЗ.