Лукашэнка параўнаў падзеі ў Адэсе з Хатынню
61- 8.05.2014, 15:21
- 37,670
Дыктатар знайшоў сярод сепаратыстаў «сваіх людзей» і пачуў іх «крык аб дапамозе».
Лукашэнка заявіў падчас сустрэчы ў чацвер у Крамлі з прэзідэнтамі Расеі, Арменіі, Кыргызстана і Таджыкістана, што падзеі ва Украіне, у прыватнасці, у Адэсе, «не дазваляюць сядзець у баку», піша «Інтэрфакс».
«Падзеі, якія адбываюцца ва Украіне, не дазваляюць нам сядзець у баку. Падзеі ў Адэсе прыводзяць нас да нядобрых паралеляў. Мы памятаем Хатынь, калі некалькі сотняў вёсак на тэрыторыі Беларусі былі спаленыя фашыстамі», - сказаў Лукашэнка.
«Мы не можам спакойна на гэта глядзець, таму што там нашы людзі, яны просяць ратунку і патрабуюць рэагавання на падобныя рэчы», - дадаў ён.
Пры гэтым, падкрэсліў ён, «насцярожвае неадэкватнае абсалютна рэагаванне з боку нашых, калі іх так можна назваць, заходніх партнёраў».
«Проста дзіўна: у адной сітуацыі гэта нельга, у іншай сітуацыі - можна і заахвочваецца», - падкрэсліў ён.
Паводле слоў Лукашэнкі, «гэта няправільны падыход, добра, ішла б нейкая дыпламатычная сварка, але тут гінуць людзі».
«Сусветная супольнасць павінна ў дадзеным выпадку выступаць кансалідавана, з агульных пазіцый і канкрэтных крытэраў, якія павінны быць адназначныя», - сказаў ён.
2 траўня ў Адэсе адбыліся масавыя сутыкненні прыхільнікаў адзінства Украіны і прарасейскіх сепаратыстаў. У выніку загінулі, па афіцыйных дадзеных, 46 чалавек. Некалькі сотняў людзей траўмаваныя.