ЗША ўвялі санкцыі супраць маскоўскага «Тэмпбанка»

Банк абвінавачваецца ў фінансаванні Башара Асада.

Міністэрства фінансаў ЗША ўключыла маскоўскі Тэмпбанк і старшыню яго праўлення Міхаіла Гаглоева ў санкцыйны спіс па Сірыі за аказанне матэрыяльнай падтрымкі і паслуг сірыйскаму кіраўніцтву, паведамляе ВВС.

Па дадзеных амерыканскага Мінфіна, "Тэмпбанк" даставіў мільёны даляраў наяўнымі ў аэрапорт "Унукава", каб перадаць кур'ерам, якія працуюць на Цэнтральны банк Сірыі, а Гаглоеў асабіста ездзіў у Дамаск, каб заключаць здзелкі з рэжымам Башара Асада ад імя "Тэмпбанка".

Акрамя таго, па звестках амерыканскага казначэйства, гэты расейскі банк дапамагаў у здзелках і падаваў фінансавыя паслугі сірыйскай дзяржаўнай нафтавай кампаніі SYTROL, якая знаходзіцца пад санкцыямі ЗША і Еўразвяза, адзначаецца ў паведамленні.

ААТ МАБ "Тэмпбанк" па выніках першага квартала 2014 года займае 250-е месца па памеры актываў у рэнкінгу "Інтэрфакс-100", перадае "Інтэрфакс". Паводле звестак, апублікаваных на сайце банка, яго акцыянерамі на 12 верасня 2013 года з'яўлялася 47 юрыдычных асоб і 2424 фізічныя асобы. Гаглоеву на 6 сакавіка 2014 года належала 9% акцый банка, адзначае агенцтва.

Таксама ў "чорны спіс" Мінфіна ЗША трапілі шэсць сірыйскіх чыноўнікаў, у тым ліку дарадца Асада генерал Баса аль-Хасан, і дзве сірыйскія нафтавыя кампаніі - Banias Refinery Сompany і Homs Refinery Сompany.

Па паведамленні АР, намеснік міністра фінансаў ЗША Дэвід Коэн заявіў, што Злучаныя Штаты таксама абмяжуюць доступ Сірыі да міжнароднай фінансавай сістэмы.

Раней прэзідэнт ЗША Барак Абама абвясціў пра рашэнне на год падоўжыць санкцыі супраць уладаў Сірыі.