Помнік князю Альгерду ў Віцебску адкрыюць 27 чэрвеня
43- 14.06.2014, 20:25
- 14,676
Віцебскі гарвыканкам у чарговы раз абяцае ўсталяваць у горадзе помнік вялікаму князю Літоўскаму.
Яго адкрыццё ўнесена ў праграму урачыстасцяў з нагоды 1040-годдзя абласнога цэнтра і павінна адбыцца 27 чэрвеня ў 15:00, пішуць «Народныя навіны Віцебска».
Як і планавалася, помнік князю, які пабудаваў віцебскія замкі, ўсталююць насупраць Свята-Уваскрасенскай царквы непадалёк ад ратушы, дзе ўжо чатыры гады стаіць пусты пастамент, упрыгожаны барэльефамі гэтых замкаў.
Аднак за час шматгадовай эпапеі з ушанаваннем памяці князя Альгерда паспеў змяніцца аўтар манумента. Замест праекта віцебскага скульптара Валерыя Магучага, які перамог у конкурсе, цяперашні варыянт помніка створаны сталічным скульптарам Сяргеем Бандарэнка, найбольш знакамітым сваімі скульптурнымі выявамі коней.
Канцэпцыя помніка не змянілася - князь Альгерд з непакрытай галавой у баявым рыштунку сядзіць на кані, трымаючы на правай руцэ сокала.