Каментатар тэлеканала «Россия»: Кіеў павінен быць уключаны ў склад РФ
109- 16.06.2014, 8:49
- 50,472
Расейскія прапагандысты дзеляцца планамі на будучыню.
Калумніст расейскай газеты «Известия» і каментатар у ВГТРК «Телеканал Россия» Максім Кананенка напісаў у Фэйсбуку скандальны пост:
«Я лічу, што наступныя рэгіёны павінны быць у складзе Расеі: Кіеў, Чарнігаў, Адэса, Чаркасы, Нікалаеў, Кіраваград, Сумы, Палтава, Херсон, Днепрапятроўск, Запарожжа, Харкаў, Данецк, Луганск. Гэта наша, і тое, што гэта знаходзіцца ў складзе нейкай «Украіны» асабіста для мяне з'яўляецца гістарычнай несправядлівасцю. Усё астатняе хай жыве як хоча - наўрад ці такая краіна зацікавіць мяне больш, чым цікавіць, скажам, якая-небудзь Польшча», - напісаў Кананенка.
Далей расейскі афіцыёзны журналіст падтрымаў дзеянні баевікоў ва Украіне:
«Другое - зыходзячы з першага, я, зразумела, унутрана падтрымліваю тых, хто цяпер ваюе супраць т.зв. «Украінскай нацыянальнай гвардыі». Я радуюся кожнаму поспеху Стралкова і кожнай няўдачы Авакова. Гэта - сумленна. Я наогул лічу Стралкоўскіх героямі, таму што яны мала таго, што паспяхова супрацьстаяць сіле, якая шматкроць іх перасягае, але яшчэ і ўвесь час рэкрутуюць у свае шэрагі ўсё больш і больш людзей, якія лічаць існаванне т.зв. «Дзяржавы Украіна» нейкай насмешкай над здаровым сэнсам».