Міністр Харкавец сядзіць на «парахавой бочцы»
16- 16.06.2014, 10:14
- 26,309
Міністра фінансаў Беларусі хочуць зрабіць «ахвярным казлом» за ўсе фінансавыя праблемы ў краіне.
Міністра фінансаў Андрэя Харкаўца выключылі са складу экспертнага савета дзяржпраграм. Раней высокапастаўлены чыноўнік не трапіў у міжведамасную працоўную групу падрыхтоўкі бюджэту на 2015 год і ў абноўлены склад Савета бяспекі, піша «Заўтра тваёй краіны».
Ці азначае гэта, што ён трапіў у няміласць?
Дырэктар даследаванняў Ліберальнага клуба Яўген Прэйгерман нагадвае, што яшчэ 6 чэрвеня чакалася вялікая нарада з удзелам Лукашэнкі па сацыяльна-эканамічнаму развіццю Беларусі.
- У апошнія паўтара-два месяцы вельмі актывізаваліся закулісныя гутаркі аб змене прэм'ера і большай часткі ўрада. Магчыма, рашэнні ў дачыненні да Харкаўца нейкім чынам з гэтым звязаныя, - мяркуе эксперт. - Паводле наяўнай цяпер інфармацыі, адстаўка высокапастаўленых чыноўнікаў перанесена на некалькі месяцаў.
Паводле слоў палітолага Аляксандра Класкоўскага, зноў даводзіцца канстатаваць, што кадравая палітыка ў Беларусі даволі не празрыстая. І апошнія пастановы, калі чыноўнік, у гэтым выпадку Харкавец, захоўвае пасаду, але, згодна з ускоснымі прыкметамі, трапляе ў няміласць, могуць быць як дрэнным прадвесцем, так і проста выпадковым збегам абставін.
- Гэты міністр сядзіць на «парахавой бочцы», бо якраз з фінансамі ў нас цяпер кепска. І ад чарговай дэвальвацыі ратуе толькі чарговае расейскае падсілкоўванне, - лічыць эксперт, але пры гэтым адзначае, што ад прафесіяналізму канкрэтнага чалавека на гэтай пасадзе мала што залежыць, паколькі фінансавая сфера кіруецца валюнтарысцкім чынам, і канчатковае рашэнне прымае "першая асоба" ў дзяржаве.
- Агульнавядома, што менавіта раздзьмухванне заробкаў напярэдадні выбараў 2010 года стала штуршком да катастрафічнага фінансавага абвалу ў 2011 годзе. Пасля таго, як з 500 да 360 даляраў абвалілася сярэдняя зарплата, менавіта Лукашэнка зноў стаў фарсіраваць павелічэнне зарплаты, і сёння мы бачым, што перакосы прывялі да раставання золатавалютных рэзерваў. Фінансавая сістэма зноў апынулася ў вельмі няўстойлівым становішчы.
Зразумела, кажа эксперт, што міністры мала што вырашаюць: тут руліць вялікая палітыка, прычым палітыка папулісцкая. Так што не выключана, што Харкаўца могуць зрабіць «ахвярным казлом» за ўсе фінансавыя праблемы, але гэта будзе пошук «стрэлачніка».
- У цяперашняй сітуацыі ў Беларусі вельмі шмат прычын, каб зрабіць таго ці іншага прадстаўніка наменклатуры «ахвярным казлом». Усе чыноўнікі ў нашай краіне ходзяць пад страхам турмы. Мы часта бачым, што барацьба з негатыўнымі з'явамі ідзе пад сцягам кампанейшчыны, - рэзюмуе Аляксандр Класкоўскі.