Затрыманых ва Украіне расейскіх прапагандыстаў вызвалілі

Журналістаў тэлеканала «Звезда» перадалі памочніку вайскова-марскога аташэ Расеі Эдуарду Белашаву.

Якіх-небудзь траўмаў у карэспандэнта Яўгена Давыдава і гукаінжынера Мікіты Канашэнкава няма, прэтэнзій да ўлад Украіны яны не выказалі і нават падзякавалі за смачныя «гарбату і катлеты». Аб гэтым паведамляецца на сайце канала.

«Перадача журналістаў адбывалася ў будынку Днепрапятроўскай АГА ў прысутнасці больш за 30 журналістаў», - гаворыцца ў паведамленні тэлеканала.

Кіраўнік медыяхолдынга «Красная звезда» Аляксей Піманаў заявіў, што вызвалення двух журналістаў тэлеканала «Звезда» атрымалася дамагчыся шляхам перамоў. «Хлопцы сапраўды на волі. Для гэтай сітуацыі адчуваюць сябе нармальна, пытанне ўдалося вырашыць дыпламатычнымі спосабамі», - распавёў Піманаў.

Другое за чэрвень затрыманне супрацоўнікаў тэлеканала «Звезда» адбылося на блокпасце нацыянальнай гвардыі ў раёне населенага пункта Пакроўскае падчас перамяшчэння ў аэрапорт Днепрапятроўска для далейшага вылету ў Маскву. 15 чэрвеня паведамлялася, што журналістаў трымалі ў будынку Мінюста Днепрапятроўскай вобласці.