Лукашэнка хоча больш грошай з Кітая

Дыктатар просіць кітайцаў павялічыць інвестыцыі ў Беларусь.

Пра гэта заявіў сёння Лукашэнка на сустрэчы з прадстаўнікамі дзелавых колаў Кітайскай Народнай Рэспублікі, дэлегацыю якіх узначальвае старшыня праўлення Кітайскай нацыянальнай машынабудаўнічай карпарацыі "Сіномач" Жэнь Хунбінь, паведамляе БелТА.

"Мы паспяхова перайшлі ад простага гандлю да рэалізацыі крэдытна-інвестыцыйных праектаў у розных сферах. Сярод іх - энергетыка, дрэваапрацоўка, будаўніцтва, транспарт, засваенне космасу. Аднак нам неабходна пашыраць узаемадзеянне ў форме непасрэднага інвеставання", - перакананы Лукашэнка.

Вітаючы прадстаўнічую дэлегацыю кітайскага бізнэсу на беларускай зямлі, дыктатар выказаў упэўненасць, што тут яны знойдуць сферы прыкладання для самых дзелавых талентаў і ідэй. "Сённяшні візіт з'яўляецца заканамернай рэалізацыяй нашых даверных і сяброўскіх дамоўленасцей са старшынёй КНР Сі Цзіньпінам і прэм'ерам дзяржсавета КНР", - сказаў ён.

Лукашэнка нагадаў, што ў ліпені 2013 кіраўнікі Беларусі і КНР падпісалі сумесную дэкларацыю, у якой закладзены асноўны прынцып узаемадзеяння дзвюх краін на перспектыву: усебаковае стратэгічнае партнёрства. У дэкларацыі адзначана агульнае імкненне Беларусі і Кітайскай Народнай Рэспублікі вывесці супрацоўніцтва на новы ўзровень з акцэнтам на інвестыцыі ў сучасныя высокатэхналагічныя праекты.