У Менску збіраюць подпісы за вуліцу Барадуліна
9- 23.06.2014, 16:23
- 4,887
Менчукі просяць надаць імя Рыгора Барадуліна адной з вуліц у сталіцы і на малой радзіме паэта.
Сэрвіс электронных зваротаў у дзяржаўныя ўстановы «zvarot.by» і «Арт сядзiба» пачынаюць кампанію збору подпісаў для ўвекавечання памяці народнага паэта Беларусі, кандыдата на Нобелеўскую прэмію ў літаратуры і аўтара дзясяткаў паэтычных зборнікаў, вялікай колькасці вершаваных перакладаў твораў сусветнай культуры на беларускую мову - Рыгора Барадуліна.
Мэта кампаніі - надаць імя Рыгора Барадуліна адной з вуліц у Менску і на малой радзіме паэта - у пасёлку Ушачы, паведамляе «Арт сядзiба».
Арганізатары звяртаюцца да Савета Міністраў з прапановай даручыць Менскаму гарвыканкаму, Міністэрству культуры і Ушацкаму райвыканкам: усталяваць мемарыяльную дошку ў Менску на доме, у якім жыў Рыгор Барадулін; надаць імя Рыгора Барадуліна школе ў вёсцы Ушачы; адкрыць літаратурны музей або філіял музея Рыгора Барадуліна.
Падпісацца ў падтрымку кампаніі можна тут.
Пачатак кампаніі прызначаны на 29 чэрвеня, у гэты дзень а 19 гадзіне ў клубе «Графіці» адбудзецца фестываль, на якім выступяць такія гурты, як Re1ikt, TESAURUS, Leibonik band, HAINA.