Сямашку прызначылі «крайнім»

Даручэнне Мінпраму разгледзець магчымасць увядзення інстытута спецімпарцёраў зыходзіла ад Уладзіміра Сямашкі.

Гэта вынікае з наяўных у распараджэнні БелаПАН дакументаў, якія суправаджаюць праект указа «Аб забеспячэнні Рэспублікі Беларусь некаторымі імпартнымі таварамі».

Нагадаем, на мінулым тыдні стала вядома аб тым, што Мінпрамам распрацаваны ўказ Лукашэнкі, згодна з якім з 1 ліпені 2014 г да 1 студзеня 2015 га дзяржаве будзе перададзена выключнае права на здзяйсненне імпарту шэрагу тавараў: радыё-, тэле-, відэа- і бытавой тэхнікі, падшыпнікаў, рухавікоў, сельгастэхнікі, грузавых аўтамабіляў, станкоў, уборачнай тэхнікі, ліфтаў, шын і іншых. Такую меру ва ўрадзе тлумачылі неабходнасцю абароны інтарэсаў дзяржавы. Планы ўвядзення інстытута спецімпарцёраў выклікалі крытыку з боку прадстаўнікоў дзелавых колаў і незалежных экспертаў.

20 чэрвеня падчас рабочай паездкі ў Гарадзенскую вобласць кіраўнік урада Міхаіл Мясніковіч у каментары журналістам заявіў: інфармацыя аб увядзенні бліжэйшым часам інстытута спецімпарцёраў не адпавядае рэчаіснасці. Урад, са слоў прэм'ера, не даваў даручэнняў аб увядзенні гэтай меры і іншых загараджальных мер на ўвоз тавараў. Каментар Мясніковіча быў размешчаны на сайце Савета міністраў 23 чэрвеня.

У сваю чаргу Мінпрам размясціў на сваім сайце паведамленне аб пастанове не ўводзіць інстытут спецімпарцёраў. «Міністэрства прамысловасці пасля разгляду з зацікаўленымі рэспубліканскімі органамі дзяржаўнага кіравання пытання надавання выключнага права дзяржаве на здзяйсненне імпарту шэрагу прамысловых тавараў працу ў падрыхтоўцы нарматыўнага дакумента ўважае немэтазгоднай, увядзенне спецімпарцёраў надалей не плануецца», - гаворыцца ў паведамленні.

Такую пастанову ўладаў эксперты і прадстаўнікі бізнес-колаў расцанілі як «перамогу здаровага сэнсу». На іх думку, улады вырашылі адмовіцца ад увядзення інстытута спецімпарцёраў, баючыся негатыўных эканамічных наступстваў, у тым ліку адмоўнага ўплыву на спажывецкі рынак, вывазу з краіны валюты, узнікнення шэрых схем імпарту.