Беларусь абмежавала пастаўкі мяса з Румыніі і Швецыі

Беларусь з 24 чэрвеня абмяжоўвае пастаўкі мяса птушкі са Швецыі.

Пра гэта паведамілі БелТА ў дэпартаменце ветэрынарнага і харчовага нагляду Мінсельгасхарча.

Паводле інфармацыі Міжнароднага эпізаатычнага бюро (МЭБ), на тэрыторыі акругі Эстэргетланд (Швецыя) зарэгістраваны выпадак захворвання птушак хваробай Ньюкасла. "У мэтах недапушчэння заносу хваробы на тэрыторыю Беларусі з 24 чэрвеня ўводзяцца часовыя абмежаванні на ўвоз у краіну з гэтай акругі Швецыі птушкі, інкубацыйных і харчовых яек, мяса птушкі, усіх тыпаў птушкагадоўчай прадукцыі і прадуктаў яе перапрацоўкі, пуху і пяра, кармоў і кармавых дабавак жывёльнага паходжання, у тым ліку з птушкі", - паведамілі ў дэпартаменце.

Адначасова касуюцца ўсе раней выдадзеныя дазволы на ўвоз на тэрыторыю Беларусі з акругі Эстэргетланд вышэйзгаданых тавараў.

Хвароба Ньюкасла (псеўдачума птушак, азіяцкая чума птушак) - высокакантагіёзная вірусная хвароба, галоўным чынам курэй, якая характарызуецца пнеўманіяй, энцэфалітам і паразамі ўнутраных органаў. Перахварэлыя кураняты дрэнна растуць. Пры вострай працяканні хваробы Ньюкасла смяротнасць сярод маладняку дасягае 100%. Хваробай Ньюкасла можа захварэць і чалавек.

З 24 чэрвеня Беларусь таксама абмяжоўвае пастаўкі жывёлы з Румыніі. Пастанова прынятая ў сувязі з інфармацыяй МЭБ аб тым, што на тэрыторыі краіны зарэгістраваны выпадак захворвання буйной рагатай жывёлы губкападобнай энцэфалапатыяй - смяротным захворваннем мозгу буйной рагатай жывёлы. Інкубацыйны перыяд гэтай хваробы доўжыцца 4-5 гадоў, а смерць звычайна надыходзіць праз некалькі месяцаў пасля з'яўлення яе сімптомаў. Губкападобную энцэфалапатыю буйной рагатай жывёлы звязваюць са з'яўленнем у людзей яе разнавіднасці - хваробы Крэйтцфельда-Якаба.

Як удакладнілі ў дэпартаменце, часовыя абмежаванні распаўсюджваюцца на пастаўкі ў Беларусь з Румыніі племянной, і забойнай буйной рагатай жывёлы, авечак і коз, дзікіх, заапаркавых і цыркавых жывёл, адчувальных да гэтага захворвання, а таксама мяса і мясной сыравіны, кармоў і кармавых дабавак жывёльнага паходжання, якія змяшчаюць у сваім складзе ДНК жвачных жывёл.