«Газпром» спыніў «Паўночную плынь»

Газаправоды, праз якія РФ пагражала пазбавіць Украіну транзіту, часова спыняюцца для рамонтных работ.

РФ вымушаная забяспечваць транзіт у Еўропу, павялічыўшы аб'ём транспартавання праз Украіну.

Газпрамаўскі марскі газаправод "Паўночная плынь" (Nord Stream) з 9:00 паводле менскага часу цалкам спынены для правядзення планавага тэхнічнага абслугоўвання. Прыпыненне газаправода, якім «Газпром» меў намер замяніць транзіт праз украінскую тэрыторыю, будзе кампенсаваць Украіна, піша zn.ua.

Так, з 28 чэрвеня не будуць працаваць абедзве ніткі магістралі, а з 28 чэрвеня да 4 ліпеня будуць працаваць па адной нітцы.

Планавыя рамонты - адзін з галоўных клопатаў газавікоў ў летні перыяд. Іх графік узгадняецца з усімі контрагентамі за шмат месяцаў да моманту правядзення планавага спынення.

У гэтым годзе планавы рамонт супаў з пераводам паставак ва Украіну на папярэднюю аплату - гэта значыць спыненнем паставак газу для ўкраінскіх спажыўцоў. Аднак вялікія запасы газу ва ўкраінскіх сховішчах (ПСГ) і нізкае спажыванне дазваляе ў гэты гадавы перыяд краіне абыходзіцца без імпартнага газу. Украіна вось ужо тыдзень абыходзіцца без імпартнага газу, а транзіт газу ў Еўропу ідзе без парушэнняў.

Прыпыненне "Паўночнай плыні" кампенсуе Украіна. На аўторак намінацыя на транзіт газу праз Украіну праз ужгарадскі калідор складае 155 млн куб м, што на 45% вышэй, чым тыдзень таму.

Пасля «Паўночнай плыні» пачнецца рамонт на «Ямал-Еўропа». З 8 да 12 ліпеня будзе на траціну (33%) зніжана магутнасць газаправода на ўваходзе ў Нямеччыну з Польшчы. З 26 да 27 ліпеня будзе дзейнічаць 50% абмежаванне, а з 5 да 9 жніўня - 28% абмежаванне магутнасці.