Цягнік з Анапы прыбудзе ў Менск з вялікім спазненнем

Цягнік, які рухаўся праз Данецкую вобласць з Анапы, прыбудзе ў Менск са значным спазненнем.

Пра гэта паведамілі ў прэс-службе Беларускай чыгункі, піша БелТА.

У даведачнай службе сталічнага чыгуначнага вакзала ўдакладнілі, у прыватнасці, што цягнік, які адправіўся з Менска 21 чэрвеня, прыбыў у Анапу з 17-гадзінным спазненнем. «Дакладны час вяртання цягніка ў Менск пакуль назваць не можам, больш падрабязная інфармацыя з'явіцца заўтра раніцай», - сказалі ў даведачнай службе.

Да падзей у Данецкай вобласці, якія адбываюцца цяпер, цягнік пераадольваў адлегласць ад Менска да Анапы за 39 гадзін.

Маршруты цягнікоў №390/389 Менск - Анапа - Менск, №46/45 Менск - Мін. Вады - Менск, №302/301 Менск - Адлер - Менск былі змененыя пасля выбуху чыгуначных шляхоў 22 чэрвеня ў Данецкай вобласці. Тры цягнікі з Менска ў Анапу, Мін. Вады і Адлер рухаюцца на ўчастку Харкаў - Растоў праз Купянск, Валуйкі, Ліскі, у выніку чаго працягласць маршрутаў павялічылася. Такія захады былі прынятыя беларускай стараной на падставе тэлеграмы Дзяржаўнай адміністрацыі чыгуначнага транспарту Украіны. Сітуацыя захаваецца да адмены яе дзеяння.

Продаж білетаў на цягнікі, якія рухаюцца на ўчастку Харкаў - Растоў, прыпынены.

Як паведамлялася, неўсталяваныя асобы здзейснілі два падрывы чыгуначных шляхоў, адзін з якіх - на ўчастку Ілавайск - Куцейнікава. На момант выбуху на перагоне знаходзіўся грузавы цягнік. У выніку выбуху сышлі з рэек 14 вагонаў. Пасля таго, што адбылося, украінская старана запэўніла, што рух цягнікоў на гэтым участку будзе адноўлены ў максімальна магчымыя тэрміны. Яшчэ адзін выпадак падрыву шляхоў быў зафіксаваны на перагоне Ілавайск - Моспіна Данецкай чыгункі.