19 абітурыентаў набралі на ЦТ па рускай і беларускай мовах 0 балаў
15- 24.06.2014, 18:38
- 16,479
Колькасць удзельнікаў ЦТ, што «не адгадалі ні адной літары», у параўнанні з мінулым годам засталася практычна такой жа.
А вось абітурыентаў сёлета менш, чым 12 месяцаў таму. Партал «Інтэрфакс» паведамляе падрабязнасці.
Спачатку - пра добрае. Згодна з інфармацыяй дырэктара Рэспубліканскага інстытута кантролю ведаў Мікалая Фяськова, паводле вынікаў цэнтралізаванага тэставання па рускай і беларускай мовах найвышэйшую адзнаку - 100 балаў - атрымалі 40 абітурыентаў. З іх 25 чалавек пацвердзілі сваю высокую пісьменнасць на ЦТ па рускай мове, 15 - па беларускай.
Ніжэй мінімальнага парога ў 10 балаў справіліся з заданнямі па рускай мове 8 319 абітурыентаў з 76 025. Па беларускай – 2 069 з 25 423. Гэта значыць, у сярэднім кожны дзесяты ўдзельнік ЦТ паказаў, што ўзровень яго пісьменнасці не адпавядае мінімальным патрабаванням, што прад'яўляюцца да першакурснікаў вышэйшых навучальных устаноў.
Нулявое веданне вышэйзгаданых навучальных прадметаў прадэманстравалі 19 абітурыентаў. «0» на ЦТ па беларускай мове ў 2 вучняў, па рускай - у 17. Гэтыя маладыя людзі не змогуць атрымаць сертыфікат аб праходжанні тэставання, а значыць, ім не свеціць паступіць нават у сярэднія спецыяльныя навучальныя ўстановы.
А цяпер параўнаем цяперашнія вынікі з леташнімі. Тады мінімальны бал на ЦТ па беларускай мове не набралі больш за 5% абітурыентаў, па рускай - 8%. Гэта можа сведчыць толькі пра тое, што сёлета «сярэднестатыстычны» ўзровень ведаў у абітурыентаў ніжэйшы, чым у 2013-м.
Летась 0 балаў атрымалі 16 удзельнікаў тэставання па рускай мове і 4 - па беларускай. Усяго 20 чалавек. У гэтым годзе - 19. Розніца мінімальная, у той час як абітурыентаў сягоння прыблізна на 10% менш, чым мінулым летам.
Што тычыцца «100-бальнікаў», то іх у 2013 годзе на ЦТ па згаданых вышэй прадметах было 45: з іх 39 здавалі рускую мову, 6 - беларускую. Розніца з мінулым уступнай кампаніяй - 5 чалавек, а з улікам колькасці тых што здавалі тады і цяпер, вынікі абодвух тэставанняў у працэнтных суадносінах практычна ідэнтычныя.
