На выходных - да +28°C

У выходныя ў Беларусі чакаецца паступовае падвышэнне тэмпературы.

Пра гэта паведамляе партал pogoda.by.

У суботу, 28 чэрвеня, значная частка краіны будзе знаходзіцца ў полі падвышанага атмасфернага ціску, толькі на паўночным усходзе захаваецца ўплыў франтальнага падзелу. Будзе пераважна без ападкаў, толькі ў паўночна-ўсходніх раёнах краіны пройдуць кароткачасовыя дажджы, магчымыя навальніцы. Уначы і зранку месцамі згусціцца туман. Тэмпература паветра ўначы плюс 4-10°C, удзень плюс 15-22°C, на паўднёвым захадзе паветра прагрэецца да плюс 23-25°C.

У нядзелю, 29 чэрвеня, уначы надвор'е будзе вызначаць у асноўным поле падвышанага атмасфернага ціску, удзень з паўднёвага захаду Еўропы пачнуць паступаць цёплыя няўстойлівыя паветраныя масы. Уначы пераважна без ападкаў, зранку і ўдзень месцамі, у асноўным на паўночна-заходняй палове краіны, пройдуць кароткачасовыя дажджы, навальніцы. Уначы і зранку ў асобных раёнах туман. Удзень месцамі моцны парывісты вецер. Тэмпература паветра ўначы плюс 8-15°C, на ўсходзе плюс 5-7°C; удзень тэмпература паветра будзе вагацца ад плюс 18°C на паўночным захадзе да плюс 28°C на поўдні краіны.