Войска РФ засяроджвае сілы і тэхніку ля мяжы з Херсонскай вобласцю
4- 27.06.2014, 15:47
- 13,449
Паблізу адміністрацыйнай мяжы з Херсонскай вобласцю Узброеныя сілы Расеі засяроджваюць сілы і сродкі.
Пра гэта паведамляе Дзяржаўны памежны камітэт Украіны.
Паводле паведамлення, учора блізу 23:30 на Арбацкую стрэлку да блокпосту ВС РФ у раёне газаразмеркавальнай станцыі прыбылі 2 БТР, 2 БМП, 1 «УАЗ», палівазапраўшчык, 10 грузавых аўтамабіляў з 4 гарматамі ВС РФ. Адпаведна, Азова-Чарнаморскім рэгіянальным кіраваннем Дзяржаўнай памежнай службы таксама праведзеная перадыслакацыя сіл і сродкаў у гэтым раёне.
Таксама паведамляецца, што падраздзяленні Дзяржаўнай памежнай службы ў памежных раёнах Луганскай і Данецкай абласцей прымаюць меры ў аднаўленні аховы і абароны дзяржаўнай мяжы.
Акрамя гэтага ў памежнай службе распавялі пра збіты расейскі беспілотнік.
«Учора, 26 чэрвеня а 15.15 памежны нарад на кірунку «Ніканораўка (РФ) - Гарадзішча (Укр)» выявіў беспілотны лятальны апарат, які рухаўся ў паветранай прасторы Украіны на вышыні 500 м уздоўж украінска-расейскай мяжы. Пасля таго, як украінскія памежнікі абстралялі беспілотны лятальны апарат, ён набраў вышыню і знік з поля зроку», - гаворыцца ў паведамленні.