Лідэры краін ЕЗ далі дабро на ўвядзенне еўра ў Літве

Еўрапейская рада выказала вышэйшую палітычную падтрымку ўвядзення еўра ў Літве з 1 студзеня 2015 года.

У зацверджаных у Брусэлі высновах Літва атрымала станоўчую адзнаку за паспяховы выхад з фінансавага крызісу і падкрэсліваецца, што гэтая краіна адказвае Маастрыхцкім крытэрам і цалкам гатовая да ўвядзення еўра.

Паводле сцвярджэння прэзідэнта Літвы Далі Грыбаўскайтэ, якая ўдзельнічае ў пасяджэнні Еўрапейскай рады, гэта важкае міжнароднае прызнанне Літвы, якое сведчыць аб тым, што яна з'яўляецца фінансава надзейным і развітым партнёрам. Пасля ўступлення ў еўразону Літва стане раўнацэнным партнёрам пры фарміраванні і прыняцці палітычных пастаноў, якія тычацца манетарнай палітыкі ЕЗ, паведамляе ru.delfi.lt.

«Увядзенне еўра не толькі прынясе прамую карысць эканоміцы і жыхарам Літвы, але і дапаможа забяспечыць разумную і адказную фінансавую палітыку дзяржаў а, не дазволіць зацвердзіцца фінансаваму папулізму», - падкрэсліла Грыбаўскайтэ.

Прэзідэнт адзначыла, што пасля ўступлення ў еўразону на пачатку наступнага года не прыйдзецца плаціць за абмен валюты, знізяцца выдаткі па пазыках, Літва стане больш прывабнай для замежных інвестараў. Паводле сцвярджэння кіраўніцы краіны, калі б Літва ўвяла еўра яшчэ ў 2007 годзе, яна пазбегла б гэтак складанага фінансавага крызісу і зэканоміла б больш за 8 млрд літаў, якія можна было б выкарыстоўваць на зніжэнне сацыяльнага расслаення.