Гродзенец падарыў жонцы кватэру - яна адразу падала на развод

Суседзі лічаць, што жанчына прысвоіла кватэру даверлівага мужа, і накіравалі пазоў у пракуратуру.

Хлопец зарабляў рамонтам кампутараў. З дзяўчынай сустрэўся на працы, а праз шэсць месяцаў пасля знаёмства ажаніліся, піша «Вечерний Гродно».

- Вырашыў стварыць сям'ю, закахаўся, - распавядае Сяргей. - Праз некаторы час няўзнак у жонкі сталі ўзнікаць прапановы аформіць кватэру на яе. Пра сваіх блізкіх казала незразумела: тата - ваенны пенсіянер, а пра маму нічога не згадвала. З яе бацькамі сустрэліся толькі на вяселлі. Цяпер успамінаю, што да мяне былі такія пытанні: адзін я ці не, колькі пакояў у кватэры, ці ёсць сваякі.

Сяргей дрэнна памятае, як падпісаў дароўную. Цяпер растлумачыць матывы сваіх паводзінаў не можа.

Фактычна яны пражылі разам усяго паўтара месяца - з 27 жніўня па 15 верасня, да таго моманту, як муж падпісаў дароўную. Фармальна, да разводу, шлюб доўжыўся паўгода. Жыць Сяргей застаўся ў сваёй былой кватэры, толькі цяпер па дамове найму.

У адзін дзень мужчына выявіў, што ў кватэры змянілі замкі. Пазней высветлілася, што былая жонка, падарыла кватэру бацьку, дамова афіцыйна завераная натарыусам. Суседзі вырашылі дапамагчы Сяргею: напісалі калектыўны зварот у пракуратуру і іншыя структуры. Лічаць, што жонка завалодала маёмасцю мужа.

Нядаўна Сяргея прызналі недзеяздольным ў сувязі з неадэкватным псіхічным станам. Ён знаходзіцца на ўліку ў УАЗ ГАКМА «Псіхіятрыя - наркалогія» з дыягназам «арганічнае галлюцінаторнае расстройства».

- Я Сяргея бачыла ў той час, калі яго «апрацоўвалі» на прадмет дарэння кватэры, - кажа яго апякун. - Раней чалавек быў больш-менш адэкватным. Потым заўважыла, што ходзіць у нейкім трансе, ні з кім не вітаецца. Падумала: адбываецца нешта.

Устаноўлена, што дамова дарэння, па якой Сяргей бязвыплатна перадаў жонцы кватэру ва ўласнасць, сапраўды заключаная. Па выніках праверкі пракурор раёна накіраваў пазоў у суд аб прызнанні здзелак дарэння несапраўднымі і вяртанні кватэры Сяргею. Аднак была прызначаная амбулаторная судова-псіхіятрычная экспертыза былога мужа. Яна павінна вызначыць, ці аддаваў ён сабе справаздачу ў сваіх дзеяннях тады, калі адмаўляўся ад жылплошчы.

Курыруе пытанне памочнік пракурора Алена Шахавец, яна тлумачыць:

- Зараз справа прыпыненая. Для таго каб высветліць канчаткова, ці можа быць прызнаная законнай дамова дарэння кватэры, мы павінны атрымаць вынікі экспертызы. Пакуль іх не маем.