Дональд Туск: Пазіцыі Польшчы і ЗША адносна Украіны супадаюць
- 3.06.2014, 20:22
- 5,804
Прэм'ер Польшчы ўдзячны ЗША за хуткую і эфектыўную рэакцыю на ўкраінскі крызіс.
Пра гэта Дональд Туск заявіў на сумеснай прэс-канферэнцыі з прэзідэнтам ЗША Баракам Абамам пасля завяршэння двухбаковых перамоваў у Варшаве, паведамляе РІА «Новости».
«Хачу сказаць, што вакол нас змянілася занадта многае, а стасункі паміж нашымі дзвюма краінамі не змяніліся і маюць такое ж фундаментальнае значэнне, як і раней. Я ўдзячны ЗША за хуткую і, з нашага пункту гледжання, эфектыўную рэакцыю на ўкраінскі крызіс. І тут я хачу адзначыць не толькі хуткую рэакцыю на ўласна крызіс ва Украіне і ў рэгіёне, але і падтрымку Польшчы (ва ўкраінскім пытанні)», - сказаў Туск.
Са слоў кіраўніка ўрада Польшчы, «гэта была і палітычная падтрымка, і практычная падтрымка, якая падвышае абаронныя магчымасці Польшчы».
Туск пацвердзіў стратэгічны характар польска-амерыканскага супрацоўніцтва.
«Я пацвердзіў прэзідэнту Абаме нашу гатоўнасць павялічыць бюджэтныя выдаткі на абарону. Мы таксама будзем старацца пераканаць нашых еўрапейскіх саюзнікаў, у тым ліку і на бліжэйшым саміце NАТO, распачаць дадатковыя намаганні ў павышэнню абараназдольнасці Паўночнаатлантычнага альянсу», - адзначыў прэм'ер-міністр Польшчы.
Туск асабліва падкрэсліў, што пазіцыі ЗША і Польшчы адносна Украіны цалкам супадаюць.
«Наша меркаванне адносна сітуацыі ва Украіне і агулам у рэгіёне, а таксама ў пытаннях энергетычнага супрацоўніцтва супадае», - сказаў польскі прэм'ер.