Швейцарыя замарозіла €137 мільёнаў на рахунках паслугачоў Януковіча

У Швейцарыі заблакаваныя сродкі, якія захоўваюцца на рахунках Януковіча і былых членаў урада.

Берн паведамляе пра прасоўванне ў расследаванні спраў супраць экс-прэзідэнта Украіны Віктара Януковіча і яго паплечнікаў. Швейцарскія банкі замарозілі 137 мільёнаў еўра. Пра гэта паведамляе Deutsche Welle са спасылкай на кіраўніка дэпартамента міжнароднага права МЗС краіны Валянціна Цэльвегера.

У Швейцарыі заблакавана ў цэлым у пераліку 137 млн. еўра, якія захоўваюцца на рахунках Януковіча і яго паплечнікаў. Як паведаміў Цэльвегер, гаворка ідзе пра сумы, заблакаваныя па распараджэнні швейцарскіх уладаў і пракуратуры. Так, па распараджэнні ўрада было заблакавана 55 млн. еўра. Пасля пракуратура дадала да гэтай сумы яшчэ 82 млн. еўра, піша УНІАН.

Супраць украінцаў, якія апынуліся ў "чорным спісе" Швейцарыі, у цяперашні час расследуецца сем крымінальных спраў, піша інфармацыйнае агенцтва AFP. Экс-прэзідэнт Януковіч і яго паплечнікі падазраюцца ў адмыванні грошай. Цэльвегер адзначыў, што ўлічваючы сітуацыю, якая склалася ва Украіне, а менавіта - "хранічную карупцыю", швейцарскія банкі цяпер вельмі асцярожна прымаюць украінскія ўклады.

Прадстаўнік швейцарскага міністэрства замежных спраў нагадаў, што рашэнне аб замарожванні актываў Януковіча і яго паплечнікаў было прынята яшчэ 26 лютага 2014 г. Ён звярнуў увагу на тое, што ўпершыню блякаванне рахункаў адбылося так хутка. Па словах Цэльвегера, такая паспешнасць неабходная для таго, каб захаваць інфармацыю для следства і ўласна грошы, каб вярнуць іх народу, у якога яны былі скрадзеныя.

Ён адзначыў, што "Швейцарыя мае дастаткова вопыту замарожвання актываў дыктатараў і вяртання іх у краіны паходжання". Паводле яго слоў, за апошнюю чвэрць стагоддзя швейцарскія ўлады вярнулі Нігерыі, Перу, Гаіці і іншым краінам у цэлым ад чатырох да пяці мільярдаў швейцарскіх франкаў. Па наяўных крымінальных справах у дачыненні да ўкраінцаў прымяняюцца менавіта гэтыя механізмы.