«Белтэлекам» абяцае змагацца са спамам
5- 5.06.2014, 13:12
- 5,446
РУП «Белтэлекам» плануе правесці мерапрыемствы, накіраваныя на мінімізацыю рассылкі спам-паведамленняў з тэрыторыі Беларусі.
Звязана гэта з вялікай колькасцю спаму, які адпраўляецца, часцяком, без ведама абанентаў, з заражаных вірусамі кампутараў. Пра гэта гаворыцца ў паведамленні на сайце кампаніі.
У прыватнасці, для абанентаў, ад якіх будзе зафіксаванае спам-рассыланне, будзе закрытая магчымасць адпраўкі электронных паведамленняў па пратаколе SMTP праз 25-ы порт паштовага кліента.
РУП «Белтэлекам» прапаноўвае абанентам праверыць свае кампутары на наяўнасць вірусаў і траянскіх праграм, а пры іх выяўленні, зрабіць лячэнне альбо выдаленне заражаных аб'ектаў.
Карыстальнікам паштовых кліентаў (Outlook Express, The Bat, Thunderbird і да т.п.), у выпадку ўзнікнення праблем з адпраўкай паштовых паведамленняў, рэкамендуем паказаць у наладах паштовай праграмы абароненыя версіі пратаколу SMTP (парты 587 і 465), калі працу з дадзенымі партамі падтрымлівае паштовы сервер.
Уладальнікаў электронных паштовых скрынь на рэсурсах gmail.com, mail.ru і да т.п. мерапрыемствы, якія праводзяцца РУП «Белтэлекам», не закрануць.