Лукашэнка пахваліўся «зачысткай» Менска перад чэмпіянатам свету

Беларускі дыктатар прапануе краінам СНД пераняць беларускі вопыт «забеспячэння бяспекі» на масавых мерапрыемствах.

Пра гэта Лукашэнка заявіў, сустракаючыся сёння з кіраўнікамі дэлегацый-удзельніц пасяджэння Савета кіраўнікоў органаў бяспекі і спецслужбаў дзяржаў СНД, перадае БелТА.

Ён нагадаў, што пяць гадоў таму ў Беларусі ўжо праходзіла пасяджэнне савета. "За гэтыя гады адбыліся сур'ёзныя змены як у свеце, так і ў самой Садружнасці, у сістэмах глабальнай і рэгіянальнай бяспекі", - заявіў кіраўнік.

Ён, у прыватнасці, са шкадаваннем адзначыў выхад з СНД Грузіі, а таксама аналагічныя планы, якія апублікавала новае кіраўніцтва Украіны.

"Тым не менш новыя выклікі і пагрозы настойліва патрабуюць каардынацыі нашых агульных намаганняў і максімальнага выкарыстання інтэграцыйных магчымасцяў Садружнасці для ўмацавання бяспекі краін-удзельніц, - падкрэсліў ён. - Сёння нас спрабуюць раз'яднаць, нацкоўваючы адзін на аднаго, выкарыстоўваючы любыя падставы, уключаючы скажэнне гісторыі. Мэта зразумелая - трэба выкараніць агульную памяць пра тое, хто перамог у Вялікай Айчыннай вайне, хто вызваліў Еўропу ад фашызму, стварыць умовы для новага перадзелу свету, зацвердзіўшы сваё панаванне ў розных частках планеты", - лічыць Лукашэнка.

Традыцыйныя міжнародныя інстытуты забеспячэння бяспекі, паводле яго слоў, не заўсёды здольныя эфектыўна супрацьстаяць глабальным выклікам і пагрозам, якія не могуць быць нейтралізаваныя на ўзроўні асобных дзяржаў. Процідзейнічаць ім можна толькі шляхам кансалідацыі намаганняў, перакананы Лукашэнка. І асаблівая роля ў гэтым працэсе, падкрэсліў ён, адводзіцца спецслужбам, іх уменню аналізаваць і прагназаваць развіццё становішча, якое складаецца.

"Нам не варта звонку чакаць эфектыўных рэцэптаў процідзеяння выклікам і пагрозам рэгіянальнай бяспекі. Мы ў адказе за стабільнасць на нашых землях і павінны фармаваць сумесныя механізмы рэагавання на дэстабілізуючыя фактары", - заявіў дыктатар.

Паводле яго слоў, Беларусь гатовая падзяліцца сваім вопытам забеспячэння бяспекі маштабных мерапрыемстваў. "Мы гэта прадэманстравалі і на спартыўным мерапрыемстве і даказалі ўсяму свету, што здольныя праводзіць падобныя сусветныя форумы. Упэўнены, што гэты вопыт будзе запатрабаваны нашымі азербайджанскімі сябрамі пры правядзенні Першых Еўрапейскіх гульняў у наступным годзе ў Баку", - сказаў Лукашэнка.

Глабальная нестабільнасць, адзначыў ён, абумоўлівае неабходнасць нарошчвання сумесных намаганняў у барацьбе з міжнародным тэрарызмам, экстрэмізмам, транснацыянальнымі дэструктыўнымі фармаваннямі, злачынствамі ў галіне высокіх тэхналогій.

Сустрэча кіраўнікоў органаў бяспекі і спецслужбаў краін СНД пройдзе сёння ў "Прэзідэнт-гатэлі". На парадку дня - каля дваццаці пытанняў, якія тычацца забеспячэння бяспекі падчас правядзення буйных міжнародных мерапрыемстваў, супрацоўніцтва спецслужбаў у барацьбе з міжнародным тэрарызмам і экстрэмізмам, процідзеяннем злачынствам у галіне інфармацыйных тэхналогій. Удзельнікі сустрэчы таксама плануюць падвесці вынікі працы Антытэрарыстычнага цэнтра ў 2013 годзе і выканання праграмы супрацоўніцтва ў барацьбе з тэрарызмам і іншымі гвалтоўнымі праявамі экстрэмізму на 2011-2013 гады.

Савет кіраўнікоў органаў бяспекі і спецыяльных службаў дзяржаў-удзельніц СНД быў створаны ў 1997 годзе. Асноўнай яго задачай з'яўляецца забеспячэнне эфектыўнага ўзаемадзеяння ў галіне барацьбы з арганізаванай злачыннасцю міжнароднага характару і ў іншых узгодненых сферах дзейнасці спецслужбаў.