Аўтамабільныя аферысты падманулі 300 менчукоў

СК паведамляе пра затрыманне дырэктара ТАА "АўтаКомпаніСэвэн" і яго кампаньёнаў па падазрэнні ў махлярстве.

"Узбуджаная крымінальная справа аб буйным махлярстве ў сферы аўтабізнесу. Паводле папярэдняй інфармацыі, ад супрацьпраўнай дзейнасці зламыснікаў маглі пацярпець не менш за 300 аўтаўладальнікаў", - паведамілі "Інтэрфаксу" ў чацвер ва ўпраўленні Следчага камітэта па Менску.

Паводле інфармацыі УСК, ТАА "АўтаКомпаніСэвэн" займалася камісійнай рэалізацыяй транспартных сродкаў прыватных уладальнікаў. "У апошні час грамадзяне сталі масава звяртацца ў праваахоўныя органы з заявамі, што пасля афармлення дамоваў з фірмай, яе прадстаўнікі не выконваюць узятыя на сябе абавязацельствы: зацягваюць тэрміны продажу, не вяртаюць грошы пад рознымі падставамі, а лёс аўтамабіляў, узятых на рэалізацыю, невядомы", - адзначылі ва УСК.

Следства выявіла, што дырэктар таварыства ў змове з некалькімі змоўшчыкамі на падставе аказання паслуг у рэалізацыі аўтамабіляў па дамове камісіі, загадзя не маючы намеру выконваць узятыя на сябе абавязацельствы, завалодалі шэрагам дарагіх транспартных сродкаў грамадзян. Іх дзеянні кваліфікаваныя ч.4 арт.209 Крымінальнага кодэкса (махлярства, здзейсненае ў асабліва буйным памеры).

Падазраваныя затрыманыя і ў цяперашні час даюць паказанні следчым. Канфіскаваная дакументацыя фірмы, кампутарная тэхніка, іншыя рэчавыя доказы. Следчыя дзеянні і аператыўна-вышуковыя мерапрыемствы накіраваныя на ўстанаўленне ўсіх абставінаў і маштабаў махлярства, колькасці пацярпелых і сумы нанесенай ім шкоды.