«Твітэр» збіраецца купіць музычны сэрвіс

Кіраўніцтва Twitter Inc. у апошнія месяцы неаднаразова абмяркоўвала магчымасць куплі музычнага сэрвісу, уключаючы Soundcloud і Spotify.

Аб гэтым піша газета Financial Times са спасылкай на інфармаваныя крыніцы.

Кампанія шукае новыя крыніцы росту і гатовая выдаткаваць на набыццё музычнага сэрвісу мільярды даляраў, каб павялічыць час, які карыстальнікі праводзяць у мікраблогах, паведамляе «Інтэрфакс».

З пачатку года акцыі «Твітэру» патаннелі амаль на 50% у сувязі з асцярогамі Уол-стрыт адносна запаволення росту аўдыторыі сэрвісу. У гэты час колькасць карыстальнікаў «Твітэру» складае пятую частку ад колькасці карыстальнікаў «Фэйсбука».

Раней кампанія эксперыментавала з уласным музычным дадаткам Twitter Music, але была вымушаная адмовіцца ад яго развіцця ў сакавіку гэтага года.

За сваю гісторыю «Твітэр» выдаткаваў на самую буйную куплю $300 млн, тады як у студзені падчас прыцягнення дадатковых сродкаў Soundcloud была ацэненая ў $700 млн. За $300 млн «Твітэр» у верасні набыў MoPub, рэкламу распрацоўкі для мабільных платформаў.

Кампанія адмовілася ад планаў куплі Soundcloud праз рознагалоссі кіраўнікоў адносна верагоднай прыбытковасці аўдыё рэкламы і асцярог, звязаных з аўтарскім правам.

Між тым аналітыкі адзначаюць, што «Твітэр» не валодае буйнымі сумамі грашовых сродкаў, на якія ён мог бы набыць музычны сэрвіс. На леташнім IPO кампанія атрымала $1,2 млрд і адкрыла крэдытную лінію на $1 млрд, але ўсё яшчэ застаецца непрыбытковай.