З «Nord City» ў Зялёным Лузе выганяюць прадпрымальнікаў

Гандляроў просяць тэрмінова вызваліць займаемыя плошчы.

Усяго некалькі месяцаў таму гандлёва-забаўляльны цэнтр «Nord City» адкрыў свае дзверы для наведвальнікаў. З лютага комплекс патроху запаўняўся новымі крамамі і гандлёвымі кропкамі. І праз усяго 4 месяцы гандляроў, якія ўладкаваліся тут, папрасілі пакінуць займаемыя плошчы, піша blizko.by.

«Nord City» - новы комплекс, не так шмат жыхароў Зялёнага Лугу пакуль з'яўляюцца яго наведвальнікамі. Прадпрымальнікі, адкрыўшы тут свае гандлёвыя кропкі і крамы, разумелі, што кліентаў прыйдзецца пачакаць, бо паходы ў якую-небудзь краму становяцца справай звычкі. Аднак усяго праз 4 месяцы пасля пачатку працы адміністрацыя гандлёвага цэнтра паведаміла, што ўсе памяшканні, якія знаходзяцца на 3-ім паверсе комплексу, павінны быць вызваленыя на працягу месяца.

Для многіх прадпрымальнікаў, якія зладзілі тут свой пункт, навіна стала шакавальнай і прыраўнялася да звесткі аб банкруцтве.

«Мы толькі пачалі сваю справу, наша крама тавараў для дзяцей прапрацавала ўсяго пару месяцаў і цяпер яе прыходзіцца зачыняць. Калі падлічыць, якія страты мы панясём, сума выйдзе блізу 50 тысяч даляраў. Гэта немалыя грошы, такога павароту падзей ніхто не чакаў», - дзеліцца прадавачка крамы дзіцячых тавараў.

Дамовы з арандатарамі гандлёвых плошчаў былі ўкладзеныя стандартныя, меркаваны тэрмін арэнды складаў 3 гады. Аднак адміністрацыя комплексу разважліва прадугледзела і варыянт аднабаковага скасавання дамовы. Такім чынам, прадпрымальнікі апынуліся юрыдычна не застрахаванымі ад падобнага зыходу.

«Калі мы падпісвалі дамовы, гэты пункт быў хутчэй фармальнасцю. Ніхто не думаў, што нас могуць наўпрост паставіць перад фактам праз усяго 4 месяцы. Многія тут падпісалі дамовы, бо меркавалі што ў іх усё прадугледжана. А выйшла вось як», - распавядае супрацоўніца крамы парфумерыі.

Прычынай для такога хуткага высялення прадпрымальнікаў з гандлёвых плошчаў стала камерцыйная выгада. Адміністрацыя наважыла здаць у арэнду вышэйзгаданыя плошчы на 3-ім паверсе комплексу сеткавай дзіцячай краме «Буслік».

Многія гандлёвыя кропкі ў комплексе ўжо разбіраюць. Адміністрацыя паведаміла прадпрымальнікам аб сваіх намерах 29 траўня, а сёння ўвесь 3-і паверх ужо пусты. Працягваюць працаваць толькі 4 крамы на ўсім паверсе, але нават тут гандляры слаба ўяўляюць, як дзейнічаць далей.

«Магчымасць адкрыць сваю справу і так выпадае не часта. Займацца бізнэсам становіцца з году ў год усё цяжэй. А калі і атрымліваецца, то абавязкова з'яўляецца вось такая «палка ў колы», - разважае гаспадыня адной з зачыненых крам.

У адміністрацыі гандлёва-забаўляльнага комплексу прадпрымальнікам прапануюць перабірацца на першы паверх, дзе яшчэ засталіся не выкупленыя гандлёвыя павільёны. Аднак, са слоў гандляроў, арэнда там будзе каштаваць значна даражэй, ды і даверу да адміністрацыі комплексу больш не засталося, бо заўтра гэтыя плошчы могуць быць здадзены камусьці яшчэ.