Пакупніка ў ProStore прымусілі заплаціць за сваю ж ваду

Наведвальніка менскага гіпермаркета затрымалі ахоўнікі.

На днях ён вырашыў здзейсніць куплі ў ProStore, размешчаным у гандлёвым цэнтры «Арэна-Сіці», піша onliner.by.

«Катаўся па веладарожцы, вырашыў заехаць туды і купіць вады-марожанага. Выбраў і аплаціў тавар на касе, пасля чаго да мяне падышоў ахоўнік і запатрабаваў паказаць змесціва майго заплечніка», - паведаміў ён.

«Я не стаў пярэчыць і адкрыў яго. У мяне ляжалі толькі мульцітул і бутэлька ад «Лідскага квасу», напалову напоўненая простай вадой. Тут ахоўнік замарудзіўся, камусьці па рацыі сказаў: «Злавілі аднаго, спусціся ўніз», - апісвае тое, што адбылося, чытач. -Што, прабачце? Пасля ён сказаў, што мне давядзецца аплаціць тавар, у іншым выпадку будзе складзены пратакол. Што? Я павінен аплаціць звычайную бутэльку са звычайнай вадой? Я ўжо шмат разоў так рабіў у звычайных крамах, супермаркетах і нават той самай «Кароне», і ніякіх праблем не было. А тут такое... Потым ён яшчэ дадаў, што трэба было падысці і паказаць ахоўніку, якога, дарэчы, паблізу не было, што вось, я пранёс гэта тут. Такія правілы. А на маё пытанне «дзе з гэтымі правіламі можна азнаёміцца?» я адказу не пачуў. Ён усё настойваў на куплі. У выніку прыйшлося расплаціцца майму сябру, бо грошай у мяне ўжо не было. 7800 на вецер, проста так. Хацелася б даведацца, хто мае рацыю, а хто не: я ці крама?» - пытаецца наведвальнік ProStore.

За каментаром журналісты звярнуліся ў службу аховы гіпермаркета. На размову там настроеныя не былі:

«Чытайце заканадаўства Рэспублікі Беларусь, у ім усё запісана: пра парадак праносу і вынасу тавараў, камеры захоўвання і гэтак далей. Па дадзеным выпадку нічога каментаваць не будзем».