Зацверджаны пратакол аб пастаўках нафты з Расеі ў Беларусь

Пагадненне будзе дзейнічаць да 31 снежня 2024 года.

Прэм'ер-міністр Расейскай Федэрацыі Дзмітрый Мядзведзеў сваім загадам N917-р зацвердзіў прадстаўлены Мінэнэрга РФ і ўзгоднены з федэральнымі органамі праект пратакола аб унясенні змяненняў у пагадненне паміж Беларуссю і РФ аб мерах ўрэгулявання гандлёва-эканамічнага супрацоўніцтва ў галіне экспарту нафты і нафтапрадуктаў, якое было падпісана бакамі 12 студзеня 2007.

Як вынікае з тэксту дакумента, апублікаванага на афіцыйным інтэрнэт-партале прававой інфармацыі РФ, у 2015 годзе Расея паставіць у Беларусь 23 млн тон нафты (з іх 22 млн тон "праз трубу"), у 2016-2024 гады - па 24 млн тон у год (з іх 23 млн тон "праз трубу"), паведамляе "Інтэрфакс".

"Названыя аб'ёмы могуць быць зменены ў залежнасці ад тэхнічных магчымасцяў магістральных нафтаправодаў не больш чым на 2%", - гаворыцца ў тэксце дакумента. Пры гэтым там адзначаецца, што з 2021 аб'ёмы паставак могуць быць павялічаныя праз ўзгадненне бакоў.

Дакумент вызначае, што кампетэнтныя органы бакоў да 1 кастрычніка кожнага года на наступны год ўзгадняюць наменклатуру і аб'ёмы рэалізацыі ў РФ нафтапрадуктаў, якія вырабляюцца на НПЗ Беларусі з расейскай нафты, з паквартальнай разбіўкай, у тым ліку ў перыяд 2015-2017 гадоў не менш за 1 млн тон аўтамабільных бензінаў штогод.

Пры гэтым рэалізацыя нафтапрадуктаў, якія вырабляюцца на НПЗ Беларусі з расейскай нафты, павінна ажыццяўляцца ўсімі суб'ектамі гаспадарання, прапарцыйна аб'ёмам перапрацоўкі, шляхам выстаўлення на расейскія біржавыя пляцоўкі, а таксама праз прамыя дагаворы паставак на рынак РФ.

Цэнаўтварэнне на нафтапрадукты праводзіцца на рынкавай аснове праз цэны, сфармаваныя на расейскіх біржавых таргах, а ў выпадку прамых кантрактаў - праз дагаворныя цэны з улікам біржавых каціровак.

У выпадку, калі кошты на рынку РФ будуць істотна ніжэй за кошты, разлічаныя праз прынцып Netback на падставе каціровак міжнародных цанавых агенцтваў на базісе "франка-завод", кампетэнтныя органы Беларусі і РФ праводзяць кансультацыі для прыняцця рашэнняў аб часовым скарачэнні ці прыпыненні рэалізацыі беларускіх нафтапрадуктаў на расейскім рынку.

Гэтае пагадненне будзе дзейнічаць да 31 снежня 2024 года.

Сваім загадам Дз. Мядзведзеў даручыў Мінэнэрга РФ з удзелам МЗС краіны правесці перамовы з беларускім бокам і пасля дасягнення дамоўленасці падпісаць дакумент ад імя ўрада РФ.