За экзамен у менскай ДАІ без чаргі патрабуюць 150 даляраў

Экзаменатары разам з інструктарамі прапануюць ахвотным «спрошчаную схему» здачы экзамену.

У сацсетках ужо некалькі дзён вядуцца абураныя размовы пра бязмежжа ў экзаменацыйным аддзеле ДАІ ГУУС Менгарвыканкама на вуліцы Сямашкі. Людзі не могуць нармальна здаць экзамен, прыходзяць а 5 раніцы або начуюць там жа пад сценамі на газоне ў намёце.

Гэта пацвярджаецца з многіх крыніц. Так, на старонцы форуму сайта onliner.by, прысвечанай здачы экзамену ў ДАІ, Наталля Шчэр піша, што «чаргу, як правіла, народ займае ўначы».

«Учора чалавек з коўдрай спаў на лесвіцы, затое быў першы. З досведу займання чэргаў магу сказаць, што людзі, якія займалі а 4-4:30 раніцы былі трыццатыя. Звычайна хтосьці ініцыятыўны вядзе лісцік з запісанымі прозвішчамі, многія начуюць у аўтамабілях, некаторыя запісваюцца, потым з'язджаюць дадому спаць і вяртаюцца бліжэй да 8-й раніцы. Пачынаюць прымаць бліжэй да 8:30, абед з 13 да 14, але ўжо а 12:30 у аўтамабілі нікога не садзяць... Гэта значыць усё ў іх павольна так: праблемы - гэта вашы праблемы», - піша яна.

Чытачка charter97.org Таццяна Сельвіч пацвярджае на нашай старонцы «Вконтакте» інфармацыю, і паведамляе яшчэ адную цікавую дэталь: высвятляецца, можна выкупіць месца ў чарзе за 200 тысяч рублёў.

«Гэта праўда! Асабіста стаяла ў чэргах з раніцы і не патрапіла! А калі хочаш без чаргі сесці ў аўтамабіль - плаці 200 тысяч. Няўжо нехта напісаў пра гэтае бязмежжа? Я і не спадзявалася», - піша яна.

У рэдакцыю charter97.org таксама прыходзяць лісты, якія пацвярджаюць усё вышэйсказанае. Наш чытач Юрый пацвярджае факт чэргаў у ДАІ і распавядае пра нахабныя паборы ДАІ ў супрацоўніцтве з інструктарамі кіравання.

«Так, у ДАІ чаргі вар'яцкія! Яшчэ ў канцы траўня мая жонка пайшла здаваць экзамен: кіраванне здало 2 чалавекі, і работнік ДАІ ласкава прапанаваў маёй жонцы ўзяць дадатковыя ўрокі, хоць яна ездзіла шчыра кажучы нядрэнна, бачыў і горшых на дарогах», - піша ён.

Супрацоўнік ДАІ параіў жонцы Юрыя канкрэтнага інструктара, яна ўзяла ў яго два урокі. Але гэта было яшчэ не ўсё.

«Калі мы зноў прыйшлі ў ДАІ, чарга была вар'яцкая. Мы патэлефанавалі новаму інструктару - і ён дапамог прайсці без чаргі да таго ж работніка ДАІ, які без усякіх прычын «заваліў» маю жонку! У выніку інструктар прапанаваў здаць экзамен за $150. На жаль жонка была ўжо ў адчаі і мы адважыліся: прыйшлі да таго ж работніка ДАІ, ён прыняў экзамен, пасля чаго мы разлічыліся з інструктарам. Увогуле не было б $150, стаялі б па 8 гадзін, як аднагрупнікі муж і жонка, якія спрабавалі трапіць на экзамен!» - рэзюмуе наш чытач.

Калі вы сутыкнуліся з такімі парушэннямі з боку супрацоўнікаў дзяржорганаў, вы можаце напісаць нам на charter97.org і расказаць аб вашых праблемах для публікацыі на нашым сайце.