Штэфан Фюле: Статус Крыму - толькі пытанне часу (Відэа)
9- 12.07.2014, 14:57
- 21,027
Цяперашні статус Крыму - гэта толькі пытанне часу.
Пра гэта заявіў камісар у пашырэнні Еўразвязу і палітыцы добрасуседства Штэфан Фюле ў інтэрв'ю «Радыё Свабода».
«Гэта вялікая несправядлівасць - нелегітымным спосабам з дапамогай «зялёных чалавечкаў» развязаць пытанне аб самастойнасці і пасля аб анэксіі часткі Украіны Расеяй», - падкрэсліў ён.
З ягоных слоў, аргументы, якія прыводзіць РФ, што «калісьці ў мінулым Крым быў часткай Расеі», - непрымальныя. «Калі б я на адну секунду прыняў гэты аргумент, то прыйшоў бы да высновы, што нам трэба мяняць межы ўсёй Еўропы. Змяняць мяжы такім спосабам нельга. Гэта, дарэчы, адна з каштоўнасцяў, на якіх трымаецца Еўрапейскі звяз», - падкрэсліў Фюле.
Акрамя таго, еўракамісар расказаў, што пытанне спрашчэння візавага рэжыму паміж Украінай і ЕЗ залежыць, у асноўным, ад украінцаў. «Вялікая праца ўжо зробленая, два ці тры гады прайшлі з добрымі вынікамі. Цяпер мы на апошняй фазе гэтых перамоваў, аб канкрэтнай імплементацыі пастаноў», - сказаў ён.
Фюле адзначыў, што калі Украіна выканае «канкрэтныя крытэрыі», з боку ЕЗ «будзе спрашчэнне візавага рэжыму да такой ступені, калі людзі з Украіны змогуць прыехаць у краіны Еўрапейскага звязу». «Тое, што адбылося з Крымам - а мы ніколі не прызнаем анэксію Крыму з боку Расеі, - не будзе мець негатыўнага ўплыву на гэты працэс», - падсумаваў ён.
Еўракамісар таксама заявіў, што ў гэтым пытанні гаворка ідзе аб адмене візаў для ўкраінцаў.