Студэнты БДУ робяць праполку градак за 500 тысяч і пакой у інтэрнаце

Будучыя юрысты і географы практыкуюцца ў праполцы ў Шчамысліцы пад Менскам.

«Асабліва складана даводзіцца ў першыя дні - калі з ног валішся ад стомы. Потым прывыкаеш, - кажа студэнтка Марыя Паўловіч у інтэрв'ю агенцтву «Менск-навіны». – Больш цяжка пачаткоўцам: не ведаюць, як апранацца, што з сабой браць. Зрэшты, свае памылкі і пралікі ўсведамляюць у першыя ж дні. Напрыклад, што трэба аддаваць перавагу не красоўкам, а адкрытаму абутку - у ім не так горача, а ногі потым можна і памыць. Або што джынсавыя шорты ў якасці працоўнай формы нязручныя - у іх складана прысядаць».

У дзень студэнт павінен прайсці паласу даўжынёй 100 метраў: зрабіў норму - вольны. Студэнты праполваюць маладыя пасадкі барбарысу, спірэі, айвы, даглядаюць за саджанцамі драўняных парод - клёну, ясеня, рабіны. Каб не мучыцца ў спякоту, некаторыя спецыяльна прыязджаюць вельмі рана, калі сонца не прыпякае так моцна.

«Здараюцца ў нас і ахвяры: хтосьці сабе па пальцу матыкай пройдзецца, напрацоўваюць мазалі, сонечныя апёкі, выяўляецца алергія на расліны», - распавядае аграном прадпрыемства Ганна Шкатула.

Распавялі студэнты і пра тое, праз што бяруць удзел у праполцы.

«На працу запісаўся, каб атрымаць інтэрнат у наступным навучальным годзе, - распавядае пяцікурснік геаграфічнага факультэта ВНУ Аляксандр Маркевіч. - А заробак тут сімвалічны: 500 тысяч рублёў».

Марыя Паўловіч пацвярджае: большасць хлопцаў і дзяўчат - іншагароднія студэнты, якія зацікаўлены ў атрыманні месца ў інтэрнаце. За працу ў УП «Шчамысліца» яно ім гарантаванае.