На Кубе арыштаваныя 100 актывістаў апазіцыі
7- 14.07.2014, 12:45
- 5,780
Чарговая акцыя апазіцыі на Кубе скончылася масавымі арыштамі.
У мінулыя выходныя паліцыя затрымала некалькі дзесяткаў чальцоў уплывовай пратэстнай групы "Жанчыны ў белым" (Damas de Blanco). Пра гэта паведамляюць самі апазіцыянеры на сваёй старонцы ў "Твітэры".
Паводле іх звестак, пад варту ўзятыя пад 100 чальцоў групы і іх прыхільнікаў. Іх арыштавалі пасля таго, як падчас традыцыйнай нядзельнай дэманстрацыі, актывісты паспрабавалі змяніць свой традыцыйны маршрут і накіраваліся да мора.
Там яны збіраліся аддаць даніну памяці загінулым падчас інцыдэнту, які адбыўся ў гэты дзень 20 гадоў таму. Тады група з 73 кубінцаў, у тым ліку жанчын і дзяцей, паспрабавала збегчы з выспы Свабоды ў ЗША, выкарыстоўваючы стары буксір. Кубінскія ўлады даслалі некалькі катэраў, каб перашкодзіць уцекачам. Паводле некаторых звестак, дзеянні, прынятыя пры гэтым, справакавалі затапленне буксіра, у выніку чаго большасць людзей, якія знаходзіліся на ім, у тым ліку 10 дзяцей, патанулі. Тых уцекачоў, хто выжыў, вярнулі на востраў, піша NEWSru.com.
Сваякі загінулых абвінавацілі ў тым, што адбылося кубінскія ўлады. Тыя, у сваю чаргу, заявілі аб няшчасным выпадку.
13 ліпеня група актывістаў пад правадырствам "Жанчын у белым" паспрабавала прайсці да гавані, адкуль 20 гадоў таму адплыў буксір з уцекачамі. У гэты момант паліцыянты наважылі ўмяшацца ў тое, што адбываецца і арыштавалі дэманстрантаў, уключаючы іх лідэра Берту Салер, піша гішпанскамоўны навінавы рэсурс Martinoticias.com.
У паведамленні адзначаецца, што праз некалькі гадзін Салер была адпушчаная на волю.
Гэта далёка не першае затрыманне "Жанчын у белым". Рэч у тым, што гэта адзіная апазіцыйная група, якой улады Кубы дазваляюць праводзіць акцыі - і тое пад кантролем паліцыі. Дэманстрацыі актывістак праходзяць кожную нядзелю. У сакавіку амаль 70 пратэстоўцаў былі затрыманыя напярэдадні візіту на Кубу Папы Рымскага Бенедыкта. Пазней усе затрыманыя былі адпушчаныя.
Назіральнікі адзначаюць, што цяперашнія арышты сталі самымі масавымі. Яны звязваюць гэта з ростам уплывовасці "Жанчын у белым", якая выклікае ва ўладаў Кубы асцярогі.
Група "Жанчыны ў белым" была створаная ў 2003 годзе сваякамі прыкладна 75 дысідэнтаў, арыштаваных на востраве Свабоды. Пазней рух стаў пашырацца за кошт далучэння ўсё новых прыхільнікаў.