Полацкія ідэолагі выберуць «чарнічнага караля»
8- 16.07.2014, 9:46
- 5,525
Чарнічнага караля і каралеву выберуць на ягадным чэмпіянаце ў Полацкім раёне.
Пра гэта паведамілі ў аддзеле ідэалагічнай працы, культуры і спраў моладзі Полацкага райвыканкама, піша БелТА.
Пра намер удзельнічаць у ягадным спаборніцтве "Полацкая чарніца-2014" ужо заявілі больш за 120 камандаў, якія прадстаўляюць установы адукацыі, культуры, аховы здароўя, прамысловыя, гандлёвыя прадпрыемствы, прафзвязныя арганізацыі раёна. Ранкам у суботу аматары чарніц адправяцца ў лясы. Старт спаборніцтвам будзе дадзены адначасова ў Палатаўскім, Азінскім, Вароніцкім, Ветрынскім, Гомельскім, Малосітнянскім сельсаветах.
Напоўніўшы кошык гаючай ягадай, канкурсанты здадуцца на ласку журы. Экспэртная рада вызначыць найлепшыя каманды, якія прадоўжаць змаганне, прыняўшы ўдзел у творчых конкурсах. Вынікі чэмпіянату будуць падведзеныя на цэнтральнай плошчы Полацка, тут жа плануецца правесці афіцыйную цырымонію прысваення ганаровых званняў "Чарнічны Кароль" і "Чарнічная Каралева" з уручэннем спецыяльных сертыфікатаў.
Жыхары Полацка і госці свята змогуць узяць удзел у майстар-класах, разнастайных конкурсах, выставах-дэгустацыях, інтэрактыўных гульнях, наведаць выставы і прэзентацыі, атрымаць кансультацыі траўніцаў, прадэгуставаць ягадныя квасы (усяго будзе арганізавана работа 11 тэматычных пляцовак).
Чарнічнае свята пройдзе ў раёне ўжо чацвёртым разам.