«Бясплатная» медыцына зноў падаражэе

Мінэканомікі і Міністэрства аховы здароўя дамаўляюцца аб тым, як адпусціць кошт медыцынскіх паслуг.

У кароткатэрміновай перспектыве можна чакаць павелічэння коштаў на паслугі дзяржаўных устаноў аховы здароўя. А вось у прыватных здзіўляюцца, навошта наогул трэба стрымліванне тарыфы, бо рынак у стане адрэгуляваць іх самастойна, пішуць «Беларускія навіны».

Рэспубліканская канфедэрацыя прадпрымальніцтва, Беларускі звяз прадпрымальнікаў, Бізнэс-саюз прадпрымальнікаў і наймальнікаў ім. Куняўскага звярнуліся ў Міністэрства эканомікі з прапановай скасаваць дзяржаўнае рэгуляванне тарыфаў на стаматалагічныя, лабараторныя і дыягнастычныя паслугі.

У адказе Мінэканомікі сказана, што ўрад выступае за паэтапную лібералізацыю коштаўтварэння на платныя медыцынскія паслугі.

У лісце ўстановы згадваецца праект пастановы ўрада, распрацаваны ў студзені і ўзгоднены Мінэканомікі ў чэрвені, згодна з якім паслугі «кансультацый лекараў-спецыялістаў выключаюцца з пераліку платных медпаслуг, тарыфы на якія рэгулююцца Міністэрствам аховы здароўя на ўзгадненне з Мінэканомікі».

Цяпер пералік платных медыцынскіх паслуг, тарыфы на якія рэгулююцца Міністэрствам аховы здароўя, уключае:

• стаматалагічныя паслугі (артадантычныя, артапедычныя і зубатэхнічныя);

• дыягнастычныя паслугі (лабараторная, прамянёвая, ультрагукавая, функцыянальная і эндаскапічная дыягностыка);

• кансультацыі лекараў-спецыялістаў (за выключэннем кансультацый замежных лекараў-спецыялістаў);

• прафілактычныя і абавязковыя медыцынскія агляды грамадзян;

• медыцынскі агляд стану здароўя грамадзян для атрымання медыцынскай даведкі аб стане здароўя, якая пацвярджае прыдатнасць да кіравання аўтамабілямі з ручным кіраваннем.

Як бачым, як у спісе як раз тыя паслугі, якія карыстаюцца вялікай папулярнасцю ў насельніцтва. Кошт гэтых паслуг рэгулюецца як для прыватных, так і дзяржаўных устаноў аховы здароўя.

Прыватныя медцэнтры, натуральна, зацікаўленыя, каб рэгуляваныя кошты былі скасаваныя на ўсе іх паслугі.

«Нас хвалюе, што мы вымушаныя стрымліваць кошты на інструментальную дыягностыку, стаматалагічныя і лабараторныя паслугі, - распавёў прадстаўнік прыватнага медцэнтра. - На нядаўняй нарадзе ў Міністэрстве аховы здароўя ішла гаворка пра тое, што рэгуляванне коштаў скасуюць, праўда, абмяжуюць нашую рэнтабельнасць да 30%. І цяпер існуюць пэўныя абмежаванні, напрыклад, ёсць рэкамендацыя не павялічваць кошты за год больш, чым на пэўны адсотак».

Спецыяліст цэнтра адзначыў, што неспадзяванка палягае ў тым, што кошт такіх паслуг, як рэнтген, УГД-даследаванні не залежыць ад узроўню абсталявання, якое для яго выкарыстоўваецца:

«Я ведаю, што ў некаторых невялікіх цэнтрах працуюць апараты, якія мы ім прадалі некалькі гадоў таму. І кошты на даследаванні такія ж, як у нас, бо тарыфы аднолькавыя. На наш погляд, стрымліванне тарыфаў з'яўляецца перашкодай для абнаўлення абсталявання ў медцэнтрах, гэта становіцца нявыгадным».

Акрамя таго, абмежаванне коштаў вядзе да таго, што ў медцэнтры выкарыстоўваюць розныя махінацыі. Напрыклад, чалавек прыходзіць на УГД, лекар агучвае выснову, а кошт выпісваецца як за даследаванне і кансультацыю.

У стаматалогіі маніпуляцыі, якія выконваюцца лекарам, старанна драбняцца, у выніку чаго, «не парушаючы заканадаўства, можна ацаніць паслугу ў 500 тысяч рублёў, а можна і ў мільён рублёў».

Агулам у камерцыйных цэнтрах на большасць паслуг кошты практычна аднолькавыя. Гэта тычыцца як тых паслуг, на якія кошты рэгулююцца, так і тых, якія вызначае сама медустанова:

«Мы штомесяц маніторым кошты, думаю, нашыя канкурэнты таксама. У выніку рынак усё рэгулюе, ніхто не зацікаўлены падымаць кошты настолькі, каб адштурхнуць кліентаў. Думаю, калі б цалкам скасавалі рэгуляванне коштаў, яны не выраслі б за адзін раз у два разы. Мы не зацікаўленыя ў тым, каб страціць кліентаў».

Што да выключэння кансультацый лекараў-спецыялістаў са спісу паслуг, кошт якіх рэгулюе дзяржава, для прыватных медцэнтраў «гэта надвор'я не робіць». Хоць бы таму, што такіх кансультацый у цэнтрах няма, а ёсць прыём спецыялістаў, кошт якіх не рэгулюецца дзяржавай.

«Можна сказаць, што нам пакінулі свайго роду шчыліну, - распавёў прадстаўнік прыватнага медцэнтра. - Мы зыходзім з таго, што прыём - гэта агляд, узяцце аналізаў (ў гінеколага, уролага), а кансультацыя - гэта толькі размова з урачом на аснове звестак аналізаў і абследаванняў, пададзеных пацыентам, іх расшыфроўка. Нашыя кошты прыёму лекара адрозніваюцца ад коштаў у дзяржаўных установах аховы здароўя менавіта таму, што там вядзецца кансультаванне, кошт якога рэгулюецца. І мы пры гэтым нічога не парушаем».

У выніку ў дзяржаўных установах аховы здароўя кошт за кансультацыю лекара ўдвая і больш меншы, чым у камерцыйных за прыём. У камерцыйных цэнтрах прыём у лекара абыдзецца мінімум у 240 тысяч рублёў, у дзяржаўных клініках кансультацыя спецыяліста каштуе 70-150 тысяч рублёў.

Лабараторная дыягностыка часам таксама значна таннейшая у дзяржаўных установах аховы здароўя. Напрыклад, у вядучых камерцыйных лабараторыях даследаванне крыві на згусальнасць, якое робяць перад аператыўнымі ўмяшаннямі (каагулаграмма), каштуе амаль 280 тысяч рублёў, а, да прыкладу, у Гарадской клінічнай інфекцыйнай лякарні Менска - пад 110 тысяч рублёў.

«Гэта не значыць, што паслугі выконваюцца горш, а даследаванні праводзяцца іншымі рэагентамі, - распавялі ў адной з дзяржаўных лякарняў. - У нас вялікі аб'ём даследаванняў, ёсць пэўныя магчымасці закупкі рэагентаў меншымі коштамі. Што да ўзроўню нашых лекараў, найлепшыя медыкі працуюць у дзяржаўнай сістэме аховы здароўя. І многія з іх вядуць прыём у прыватных цэнтрах, дзе проста вышэйшыя кошты на паслугі».

Між тым, у абгрунтаванні пастановы аб скасаванні рэгулявання коштаў на некаторыя медпаслугі Мінэканомікі адзначае, што выдаткі на правядзенне аналізаў і дыягностыку растуць, а кошты за гэтыя паслугі застаюцца на месцы, што зніжае іх якасць.

Увогуле, атрымліваецца, што ініцыятыва адпусціць кошты з'яўляецца адлюстраваннем клопату дзяржавы пра насельніцтва. Акрамя таго, нас супакойваюць - далейшае скарачэнне сферы ўжывання рэгуляваных тарыфаў на платныя медпаслугі будзе праводзіцца па меры росту даходаў насельніцтва і стабілізацыі коштавай сітуацыі на рынку гэтых паслуг.

Платныя паслугі і экспарт медыцынскіх паслуг - важная складнік фінансавання медыцынскай галіны. І ўсё ж узнікае пытанне правамернасці бізнэсу на грамадзянах Беларусі ў дзяржаўных установах аховы здароўя.

Бо мы плацім падаткі, якія сферу фінансуюць. А калі звяртаемся ў дзяржаўную ўстанову па платную медыцынскую паслугу, плацім другі раз. Акрамя таго, пазабюджэтная дзейнасць - гэта адцягненне персаналу, якога і так не стае, абсталявання і лабараторый на платных пацыентаў у шкоду тым, хто заплаціць не можа.