ЕЗ увядзе санкцыі супраць расейскіх кампаній

Лідэры Еўрапейскага звязу маюць намер пашырыць санкцыі ў дачыненні да Расеі.

Пра гэта сведчыць праект заявы, які трапіў да агенцтва Bloomberg.

ЕЗ будзе дамагацца спынення фінансавання новых расейскіх праектаў у лініі Еўрапейскага банка рэканструкцыі і развіцця (ЕБРР). Таксама Еўразвяз можа загадаць Еўрапейскаму інвестыцыйнаму банку (EIB) спыніць фінансаванне новых праектаў у дзяржсектары РФ, піша "Інтэрфакс".

Пад санкцыі падпадуць расейскія кампаніі, якія Брусэль "разглядае як удзельнікаў у дэстабілізацыі сітуацыі на Украіне", гаворыцца ў чарнавым варыянце дакумента.

"ЕЗ асуджае далейшыя незаконныя дзеянні прадстаўнікоў узброеных фармаванняў на ўсходзе Украіны", - адзначаецца ў праекце.

Акрамя таго, ЕЗ мае намер прыпыніць двухбаковыя і рэгіянальныя праграмы супрацоўніцтва з Расеяй.

Лідэры Еўразвязу плануюць разгледзець "дадатковыя захады, у прыватнасці, абмежаванне інвестыцый" у Крым і Севастопаль.

Лідэры ЕЗ 27 чэрвеня запатрабавалі ад прэзідэнта РФ Уладзіміра Пуціна рэалізацыі чатырохэтапнай праграмы дээскалацыі напружанасці на Украіне. У праекце заявы ліпеньскага саміту гаворыцца, што патрабаваныя меры не былі зрэалізаваныя ў поўнай ступені.

Праект заявы будзе разглядацца ўвечары ў сераду на пазачарговым саміце лідэраў ЕЗ і можа зазнаць істотныя змены, адзначае Bloomberg. Афіцыйна перамовы стартуюць а 19:00 паводле менскага часу ў Бруселі.

Індэкс ММВБ перайшоў да зніжэння пасля з'яўлення папярэдняй інфармацыі пра санкцыі, рубель скараціў рост да бівалютнага кошыку да 0,1%.