Капітанам менскага «Дынама» застанецца Аляксей Калюжны

Аляксей Калюжны будзе капітанам менскага «Дынама» ў новым сезоне КХЛ.

Пра гэта сёння расказаў журналістам галоўны трэнер "зуброў" Любамір Покавіч.

Сёння сталічны клуб правёў першую, пасля выхаду каманды з адпачынку, адкрытую трэніроўку на «Мінск-Арэне», паведамляе БелТА.

«Мы разлічваем на Аляксея Калюжнага як на лідэра каманды. Асістэнтамі капітана будуць выступаць Дзмітрый Мялешка, Аляксандр Кулакоў і Джонатан Чычу», - сказаў Любамір Покавіч.

У той жа час самога капітана дынамаўцаў падчас сённяшніх лядовых заняткаў не было. Ён пакуль не будзе ўдзельнічаць у такой працы, паколькі да яе яшчэ не гатовы пасля аперацыі на спіне, перанесенай у Італіі пасля хакейнага ЧС-2014. Паводле звестак прадстаўнікоў дынамаўскай дружыны, аднаўленне Калюжнага ідзе хутчэй чаканага, але пры ўдалым збегу абставінаў ён зможа далучыцца да партнёраў толькі ў першых матчах будучага рэгулярнага сезона КХЛ.

Агулам, пяць дынамаўскіх хакеістаў з розных прычынах пакуль не могуць паўнавартасна працаваць з камандай. Акрамя Аляксея Калюжнага, сярод іх форварды Сяргей Дрозд і Анатоль Пратасеня, а таксама абаронцы Яўген Лісавец і Андрэй Філічкін. Дрозд, Пратасеня і Лісавец праходзяць паглыбленае медыцынскае абследаванне, а Андрэй Філічкін атрымаў на адной з нядаўніх трэніровак пашкоджанне нагі. Папярэдні дыягназ - разрыў звязак. Галоўны трэнер Любамір Покавіч выказаў упэўненасць, што праз тыдзень гэты гулец вернецца ў шэрагі. Чэшскі абаронца Лукаш Крайчак менш за тыдзень таму быў праапераваны з нагоды апендыцыту і сёння правёў на лёдзе толькі 15 хвілін. Пакуль ён будзе працаваць паводле палегчанай праграмы. Крайчак, а таксама Калюжны і Філічкін не выйдуць на лёд у першым хатнім таварыскім матчы міжсезоння, які запланаваны на 26 ліпеня з клубам СКА (Санкт-Пецярбург).

Любамір Покавіч адзначыў, што не думае, што будучы спарынг занадта ранні на этапе перадсезонных збораў. На наступны збор у чэшскай Краварже ён плануе ўзяць 25 хакеістаў. Разам з тым настаўнік «зуброў» падкрэсліў, што тыя, хто не паедзе ў Чэхію, асабліва хакеісты, якія знаходзяцца на кантрактах, не выпадуць з прэтэндэнтаў на трапленне ў склад на будучы сезон. «З улікам таго, што ёсць шэраг хакеістаў, якія пакуль не могуць трэніравацца, фактычна ў нас і ёсць толькі 24 гульцы без уліку Крайчака. Таму ва ўсіх шанцы роўныя», - канкрэтызаваў Покавіч. Славацкая спецыяліст запэўніў, што ў клубе не будуць адыходзіць ад легіянерскай формулы (шэсць палявых плюс адзін брамнік), нават з улікам таго, што замежных гульцоў у ростэры цяпер больш. Аднак ён не стаў удакладняць, якім чынам будзе развязвацца гэтая задача.

Адказваючы на пытанне аб тым, як зменіцца стыль гульні з прыходам новых выканаўцаў, Любамір Покавіч сказаў: «Зразумела, збольшага гульня зменіцца. Але не карэнным чынам. З аднаго боку практычна цалкам памяняўся замежны легіён, але з другога - беларусы засталіся ў асноўным тыя ж. Сышоў Андрэй Стась, але прыйшоў Аляксандр Кулакоў. Абарона засталася тая ж».

У абноўленым трэнерскім штабе менскага «Дынама» Любамір Покавіч плануе раўнацэннае размеркаванне абавязкаў. Аляксей Шчабланаў, які выступаў на пазіцыі галкіпера ў бытнасць гульцом, сканцэнтруецца на працы з брамнікамі. Экс-абаронца Уладзімір Копаць будзе адказваць за лінію абароны і арганізацыю гульні ў меншасці. Экс-форвард Андрэй Кавалёў павінен працаваць над павышэннем выніковасці нападнікаў. Таксама ў зоне яго адказнасці камандныя дзеянні ў большасці.

Каментуючы задачы, якія будуць стаяць перад «Дынама» ў будучым сезоне, Любамір Покавіч сказаў, што да іх ставіцца выхад у плэй-оф Кубка Гагарына КХЛ, а таксама падрыхтоўка гульцоў для нацыянальнай каманды Беларусі. Настаўнік удакладніў, што ў цэлым адна з першых мэтаў клуба - гэта падвышэнне класа хакеістаў, каб яны маглі выступаць на высокім узроўні ў зборных камандах краіны розных узростаў.

Гаворачы пра бліжэйшыя перспектывы трэніровачнага працэсу дынамаўцаў, Любамір Покавіч сказаў, што гульцы будуць працаваць паводле плану ў рэжыме двухразовых трэніровак, чаргуючы лёд і трэнажорную залу.

Фота: pressball.by