Жыхары Масюкоўшчыны: На выходных у нас сапраўднае пекла

Калі рынак «Ждановічы» наважылі акультурыць, там не знайшлося месца для папулярнай барахолкі «Поле цудаў».

Цяпер «Поля» няма, затое цудаў стала больш. Пасля рэканструкцыі пляцоўкі праца паводле новых правілаў для большасці мясцовых гандляроў апынулася не па кішэні. І паступова стыхійны рынак разросся ўздоўж чыгункі. Час ад часу нелегальны гандаль разганяла міліцыя і падатковая, але ў выніку ўлады толькі адзначалі: «Ну што возьмеш з бабулек!» Сапраўды, пару бабулек з паношанымі рэчамі наўрад ці камусьці перашкодзілі б, але стыхійны гандаль ператварыўся ў стыхійнае бедства для жыхароў прыватнага сектара на вуліцы Масюкоўшчына, піша sb.by.

Субота. Гадзіна дня. У гэты час тут самы гандаль. Прадаўцы, чалавек 30, прама з асфальту прапануюць разнастайны антыкварыят - ад манет і савецкіх значкоў да пажоўклых ад часу кніг. Зрэшты, такія «бізнэсмэны» губляюцца ў натоўпе гандляроў польскімі парашкамі і бойлерамі, разнастайнымі гарбатамі-трусамі-сантэхнікай. Ну і як водзіцца: вось нехта прама пад плот выкінуў пакеты, праз пару крокаў праход у чыйсьці двор загарадзілі кавалкі велізарнай упакоўкі з пенапласту. А за антысанітарыю, прынамсі, потым прад'явяць штраф уладальнікам дамоў, маўляў, не глядзіце за сваім участкам. А тыя проста ўжо не ведаюць, куды звяртацца.

Стаміліся ад пастаяннага бруду. Праз плот ім перакідваюць нават выкарыстаныя памперсы! Кажуць, гандляры з дзецьмі прыязджаюць, трэба ж недзе малых пераапранаць. У прыбіральню ходзяць пад платы, выкопваюць бульбу, а на ўсе заўвагі адказваюць хамствам. Жыхары некалькіх дамоў не хаваюць абурэння:

- У нас сапраўднае пекла ў ноч з пятніцы на суботу і з суботы на нядзелю. Як раз у гэты час з чатырох раніцы гандляры прыходзяць «браняваць» месцы. Крыкі, лаянка. І ў госці сорамна кагосьці запрасіць, такі бардак - і прама каля дома!

Жыхары гэтай вуліцы звыклыя да нязручнасцяў. Вадаправода і каналізацыі ў прыватным сектары няма, ацяпленне да гэтага часу пячное, прыбіральні, натуральна, на вуліцы. Але яшчэ адно выпрабаванне перапоўніла чашу цярпення.

Гандаль павінны кантраляваць мясцовая адміністрацыя, падатковая інспекцыя і міліцыя. Супрацоўнікі праваахоўных органаў прыехалі па выкліку і ў выніку параілі жыхарам Масюкоўшчыны скінуцца і купіць для гандляроў...біятуалет. Звярнуліся грамадзяне ў гандлёвы аддзел адміністрацыі Фрунзенскага раёна. Але там пачулі тое ж, што і я: «Наш аддзел нікому не даваў права размяшчацца на асфальце ў Масюкоўшчыне. Але што мы можам зрабіць? Людзі сталі там і гандлююць, а да адказнасці іх прыцягнуць складана». Як аказалася, пытанне абмяркоўвалася нават на ўзроўні гарвыканкаму.

- Цяпер мы павінны знайсці месца пад «блышыны рынак» на нашай тэрыторыі. Месца трэба абгарадзіць, каб рынак нікому не перашкаджаў. Спынілі выбар на пляцоўцы каля станцыі «Лебядзіны», але апошняе слова за архітэктарамі, - тлумачыць першы намеснік кіраўніка адміністрацыі Фрунзенскага раёна Сяргей Жалязняк.

А што падатковая? Як толькі вызначацца з пляцоўкай, усіх нелегалаў абяцаюць узяць пад кантроль: будуць тавар канфіскоўваць. А пакуль штрафуюць па мінімуму - ад 0,5 да 2 базавых велічынь. Ці развяжа гэта набалелую праблему? Жыхары Масюкоўшчыны пакуль у гэтым не ўпэўненыя.