Кампаніі B&B Insurance вярнулі ліцэнзію

Міністэрства фінансаў аднавіла дзеянне ліцэнзіі на ажыццяўленне страхавой дзейнасці ААСТ «Бі энд Бі іншурэнс Ко».

Пастанова аб гэтым прынятая ў сувязі з ліквідацыяй страхавой арганізацыяй раней выяўленых парушэнняў патрабаванняў страхавога заканадаўства. Дзеянне ліцэнзіі на ажыццяўленне страхавой дзейнасці аднаўляецца з 21 ліпеня, піша БелаПАН.

Як паведамлялася раней, Мінфін загадаў страхавой кампаніі да 1 красавіка 2014 г. забяспечыць паўнату і правільнасць фарміравання страхавых рэзерваў, а таксама размяшчэння і інвеставання іх сродкаў. Страхоўшчыку быў прадстаўлены максімальна магчымы для ліквідацыі тэрмін - 5 месяцаў. Аднак на пазначаную дату ААСТ «Бі энд Бі іншурэнс Ко» не ліквідавала парушэнні, забяспечыўшы грашовымі сродкамі і ўкладаннямі ў аб'екты нерухомасці толькі 36,2% страхавых рэзерваў.

На думку рэгулятара, «сітуацыя,якая склалася ў страхавой арганізацыі, мела рызыку няздольнасці страхоўшчыка своечасова і ў поўным аб'ёме зрабіць выплаты пры надыходзе страхавых выпадкаў з прычыны адсутнасці грашовых сродкаў».

У сувязі з гэтым, «зыходзячы з патрабаванняў заканадаўства і ў мэтах абароны інтарэсаў страхавальнікаў, каб не дапусціць нарошчвання незабяспечаных абавязацельстваў», Міністэрства фінансаў з 15 траўня прыпыніла дзеянне ліцэнзіі «Бі энд Бі іншурэнс Ко».

Кампанія не мела магчымасці ўкладаць новыя дамовы страхавання. Пры гэтым захоўвалася абавязацельства ажыццяўляць страхавыя выплаты і прымаць чарговыя страхавыя ўзносы паводле дзеючых дамоваў страхавання.