На месцы катастрофы «Боінга» абстралялі місію АБСЕ
19- 19.07.2014, 17:57
- 35,646
Назіральнікаў АБСЕ, якія прыбылі на месца катастрофы лайнера з Малайзіі, абстралялі.
Пра гэта заявіў прэзідэнт Украіны Пётр Парашэнка на сустрэчы з міністрам замежных спраў Нідэрландаў Франсам Тымермансам у суботу ў Кіеве.
«Учора, нягледзячы на дасягнутую дамоўленасць, прадстаўнікі АБСЕ былі абстраляныя», - паведаміў ён.
У суботу еўрапейскія экспэрты вярнуліся, адзначыў прэзідэнт. Пры гэтым ім зноў перашкаджаюць працаваць: не даюць магчымасці збіраць доказы, груба абыходзяцца з целамі загінулых, пішуць «Падрабязнасці».
«Мы мяркуем, што гэтая сітуацыя з'яўляецца недапушчальнай. Мы не дапусцім перашкоды ў працы камісіі, і таго, каб прадстаўнікі іншых краін не мелі магчымасці правесці аб'ектыўнае даследаванне», - заявіў Парашэнка.
У сваю чаргу ў спецыяльнай маніторынгавай місіі АБСЕ паведамілі, што падчас знаходжання назіральнікаў на месцы авіякатастрофы ў Данецкай вобласці быў ажыццёўлены папераджальны стрэл, калі «хтосьці перасягнуў дазволеную лінію».
«Быў ажыццёўлены папераджальны стрэл уверх, бо нехта перасягнуў дазволеную лінію», - паведамілі ў прэс-службе місіі.
Інцыдэнт адбыўся, калі міжнародныя назіральнікі ўжо пакідалі месца трагедыі. Ніхто не пацярпеў. Агулам, паводле звестак місіі, назіральнікам дазволілі хадзіць па больш шырокай тэрыторыі з доступам да целаў загінулых. «Таксама мы пагутарылі з мясцовымі жыхарамі. Сёння не было такога строгага рэжыму, як учора», - распавялі ў прэс-службе.
У нядзелю назіральнікі АБСЕ плануюць працягнуць маніторынг сітуацыі на месцы авіякатастрофы.