Кітаец выклаў $500 тысяч за абед з Клінтанам

Кітайскі бізнэсовец заплаціў паўмільёна даляраў за тое, каб паабедаць з былым прэзідэнтам ЗША і яго жонкай.

Дабрачынны інтэрнэт-аўкцыён, на якім разыгрываўся абед, праводзіла амерыканская арганізацыя Charitybuzz, якая спецыялізуецца на продажы сустрэч са знакамітасцямі, паведамляе ІТАР-ТАСС са спасылкай на New York Post.

Паводле звестак газеты, атрыманыя сродкі будуць накіраваныя ў дабрачынны Фонд Клінтанаў, сярод асноўных напрамкаў працы якога - барацьба з беднасцю і глабальным змяненнем клімату, дапамога краінам, якія развіваюцца, а таксама ўдзел у ліквідацыі наступстваў стыхійных бедстваў.

Запрашэнне на абед разлічана на дзве персоны. Як стала вядома New York Post, бізнэсмэн пацікавіўся, ці можна яму ўзяць з сабой не толькі жонку, але і дзяцей. На што Клінтаны нібыта адказалі, што тады гэта будзе каштаваць яму ўжо ў $1 млн. «Муж і жонка падумалі і наважылі пакінуць дзяцей дома», - адзначае газета.

Паводле ўмовы дамовы, абед з Клінтанам разлічаны на 45 хвілін - 01:00. Такім чынам, кошт адной хвіліны знаходжання ў кампаніі з 42-м прэзідэнтам ЗША і яго жонкай складае не менш як $8,3 тыс. Ва ўсякім разе, іранізуе выданне, шчасліўчыкам будзе дазволена сфатаграфавацца з былымі гаспадарамі Белага дома.

Хілары Клінтан лічыцца адным з найбольш верагодных кандыдатаў ад Дэмакратычнай партыі на прэзідэнцкіх выбарах у 2016 годзе. Між тым сама экс-дзяржсакратарка сцвярджае, што пакуль не вызначылася, ці будзе браць удзел у барацьбе за Белы дом.

З моманту заснавання ў 2005 годзе Charitybuzz сабрала больш за $100 млн для розных дабрачынных арганізацый. У розны час на аўкцыёнах разыгрываліся сустрэчы з такімі знакамітасцямі, як рэжысёр Джэймс Кэмеран, галоўны рэдактар амерыканскага выдання часопіса аб модзе Vogue Ганна Вінтур, адзін з заснавальнікаў гурту The Beatles Пол Макартні, брытанскі спявак Элтан Джон, медыямагнат Руперт Мердак, мадэльер Карл Лагерфельд, тэлевядучая Опра Уінфры. Charitybuzz пакідае сабе 20% выручаных сродкаў.