68-гадовую беларуску дэпартуюць з Егіпта
2- 21.07.2014, 15:07
- 22,251
Разглядаецца пытанне аб дэпартацыі з Егіпта грамадзянкі Беларусі Ганны Лотыш.
Пра гэта паведаміў БелаПАН прэс-сакратар беларускага МЗС Дзмітрый Мірончык.
Паводле ягоных слоў, 20 ліпеня яна была дастаўленая ў паліцэйскі пастарунак у населеным пункце Аль-Арыш у 50 км ад памежнага пераходу «Рафах». Дзмітрый Мірончык адзначыў, што Ганна Лотыш была затрыманая на мяжы Егіпта за парушэнне пашпартна-візавага рэжыму і незаконнае перасячэнне мяжы.
17 ліпеня беларуска выехала з сэктара Газа, дзе праходзіць ізраільская апэрацыя, у Егіпет з вялікай групай расейцаў і ўкраінцаў. Пасля чаго сваякі страцілі з ёй сувязь.
Дачка жанчыны Віялета Абу-Насар, што засталася ў палестынскім анклаве, паведаміла, што ейная маці Ганна Лотыш у свой час трапіла ў сэктар Газа нелегальна - праз падземныя кантрабандысцкія тунэлі. Яна падазрае, што гэтая акалічнасць пры адсутнасці патрэбных штампаў у пашпарце магла пры выездзе стаць падставай для затрымання паджылай жанчыны егіпецкімі памежнікамі і наступнай дэпартацыі.
«Я скантакталася з беларускімі дыпламатамі ў Каіры і паведаміла ім... Маёй маме 68 гадоў, у яе хворае сэрца і падвышаны ціск», - сказала суразмоўца агенцтва.