На палетку пад Зэльвай згарэў камбайн

Разам з машынай знішчана і 300 кілаграм пшаніцы.

Паведамленне аб узгаранні тэхнікі паступіла ратавальнікам 21 ліпеня а 19:42, паведамляе прэс-служба МНС.

На палетку недалёка ад вёскі Чырвонае Сяло загарэўся камбайн "CLAАS Lexion 580" 2005 года выпуску, нямецкага вырабу. Узгаранне заўважыў механізатар ў люстэрка задняга выгляду, полымя хутка распаўсюджвалася на камбайн. Тэхніку спрабавалі патушыць сваімі сіламі, але калі ратавальнікі прыбылі на месца, камбайн гарэў адкрытым полымем. У выніку пажару пашкоджаны два колы, кабіна, маторны адсек, часткова бункер, 300 кг пшаніцы ў бункеры камбайна. Людзі не пацярпелі.

Вядома, што ў камбайне знаходзілася 5 т пшаніцы. Ён быў абсталяваны патрэбным супрацьпажарным інвентаром, меліся 4 вогнетушыцелі, ёмістасць з вадой. Недалёка (у 50 м) на полі таксама знаходзілася бочка з 1,5 тысяч літраў вады. Усяго на палетку працавалі 4 адзінкі тэхнікі.

Прычына пажару высвятляецца.