Газманава і Кабзона не жадаюць бачыць і ў Літве

Моладзевы рух Саюза айчыны - Хрысціянскіх дэмакратаў Літвы патрабуе не пускаць у краіну рупараў расейскай прапаганды.

Моладзевы рух Саюза айчыны - Хрысціянскіх дэмакратаў Літвы звярнуўся да кіраўніцтва краіны і адказных службовых асоб, заклікаючы іх узяцца за адпаведныя дзеянні, уключаючы забарону на ўезд для рупараў расейскай прапаганды, піша ru.delfi.lt.

«У кантэксце анэксіі Крыму мы сталі сведкамі таго, як расейскія артысты сталі палітычным рупарам і абаронцамі Крамля. Тыя ж самі артысты сваімі творамі, якія часта змяшчаюць намёкі на гонар Савецкім Саюзам, прыязджаюць на выступы ў Літву, размяшчаючы адпаведныя паведамленні, якія апраўдваюць прапаганду Крамля», - кажа кіраўнік руху Радвіле Маркунайте-Мікуленене.

У звароце адзначаецца, што выканаўцы, якія праслаўляюць савецкі парадак, які азначаў разбурэнне літоўскай дзяржавы, прыязджалі ў Літву, што выклікала вялікую незадаволенасць грамадзян. Тады ўлады Літвы не адрэагавалі.

Моладзевы рух вітае пастанову латвійскага МЗС не пускаць у сваю краіну такіх артыстаў і заклікае літоўскіх службовых асоб рушыць услед прыкладу суседняй краіны.

«Пастанова Міністэрства замежных спраў Латвіі не ўпускаць такіх артыстаў у сваю краіну, дэманструе прынцыповую палітыку, накіраваную супраць інфармацыйнай прапаганды», - гаворыцца ў звароце.

Як паведамлялася, міністр замежных спраў Латвіі Эдгар Рынкевіч прыняў пастанову на нявызначаны час уключыць у спіс асоб, якім забаронены ўезд у Латвію, расейскіх музыкаў Алега Газманава, Іосіфа Кабзона і Алу Перфілаву, больш вядомую пад сцэнічным псеўданімам Валерыя.

Рынкевіч паказаў, што уключаныя ў «чорны» спіс расейскія артысты ў апошнія месяцы актыўна публічна падтрымлівалі анэксію Крыму як на канцэртах, так і падпісваючы розныя лісты.

Выступы трох вышэйназваных расейскіх артыстаў былі запланаваныя на канцэрце адкрыцця «Новай хвалі», а Валерыя значыцца і сярод удзельнікаў заключнага канцэрта.