Жыліна могуць вызваліць на гэтым тыдні

Следства не знайшло доказаў віны экс-старшыні канцэрна «Белнафтахім».

Экс-старшыня канцэрна «Белнафтахім» Ігар Жылін, факт затрымання якога раней пацвердзіла амбасада РФ у Менску, можа быць вызвалены на гэтым тыдні.

«Чакаецца, што Ігар Жылін будзе вызвалены ў бліжэйшыя пару дзён», - паведаміла выданню «Беларусы і рынак» крыніца ў нафтавых колах, знаёмая з сітуацыяй. З яе слоў, Жылін быў затрыманы паводле ўскоснага абвінавачвання аднаго з кіраўнікоў нафтахімічнага прадпрыемства, які пасля яго нядаўняга прызначэння на адну з кіруючых пасад выявіў нібыта вялікія фінансавыя праблемы на прадпрыемстве.

Суразмоўца адзначыў, што ў выніку вывучэння гэтага пытання не было прад'яўлена доказаў віны Жыліна.

Раней паведамлялася, што Жылін быў затрыманы 1 ліпеня паводле абвінавачвання ў злоўжыванні ўладай або службовымі паўнамоцтвамі.

Жылін быў звольнены з пасады старшыні канцэрна «Белнафтахім» пастановай урада ад 30 чэрвеня №631 «Аб вызваленні і прызначэнні некаторых службовых асоб». З пяці чалавек, вызваленых ад займаных пасадаў, прычына звальнення не паказаная толькі ў дачыненні да І. Жыліна.

У студзені гэтага года Жыліну споўнілася 73 гады. Паводле звестак выдання, ён некалькі разоў прасіўся ў адстаўку па стане здароўя. У пачатку года ў нафтавых колах цыркулявалі чуткі пра тое, што адстаўка Жыліна будзе вось-вось прынятая, а канцэрн «Белнафтахім» можа ўзначаліць экс-дарадца Лукашэнкі Сяргей Ткачоў.

У жніўні 2009 года Жылін быў прызначаны генеральным дырэктарам ААТ «Гродна Азот».

4 лютага 2011 года Ігар Жылін быў прызначаны старшынём дзяржканцэрна «Белнафтахіма».

Жылін нарадзіўся ў 1941 годзе ў Арджанікідзэ (цяпер Уладзікаўказ). Працаваў гендырэктарам Расашанскага ВА «Мінугнаенні». У 1990-1993 гадах І. Жылін быў дэпутатам Вярхоўнага Савета Расеі, з'яўляўся намеснікам старшыні парламенцкага камітэта ў пытаннях эканамічнай рэформы і ўласнасці. З 2003 года працаваў тэхнічным кансультантам кампаніі «СреднеАзГаз» (Масква), з 2006 года - першым намеснікам генеральнага дырэктара АТ «Энэрджы Інвест» (Руставі, Грузія).