БАТЭ выйшаў у трэцяе кола кваліфікацыі Лігі чэмпіёнаў

22 ліпеня ў матчы ў адказ другога кваліфікацыйнага кола БАТЭ на выездзе згуляў унічыю 1:1 з албанскім «Скендэрбэу».

У барысаўцаў на 29-й хвіліне вызначыўся Анры Хагуш, галавой замкнуўшы накід Максіма Валадзько. На 67-й хвіліне лік сквітаў Марка Радаш, пасля стрэлу якога мяч не змог утрымаць брамнік БАТЭ Сяргей Чэрнік.

Першы матч, які адбыўся 15 ліпеня ў Барысаве, таксама не выявіў пераможцу - 0:0.

У наступнае кола беларускі клуб прайшоў за кошт гола на чужым полі.

Спаборнікам БАТЭ ў трэцім коле кваліфікацыі стане пераможца пары «Дэбрэцэн» (Вугоршчына) - «Кліфтанвіл» (Паўночная Ірландыя). Першы матч гэтых камандаў у Белфасце закончыўся ўнічыю - 0:0.

Матчы трэцяга кваліфікацыйнага кола пройдуць 29/30 ліпеня і 5/6 жніўня.