Студэнт педуніверсітэта: Настаўнікам папрацую не больш за два гады

Чаму абітурыенты-выдатнікі ідуць на педагагічныя спецыяльнасці?

Адным з новаўвядзенняў уступнай кампаніі гэтага года стала магчымасць паступіць на педагагічныя спецыяльнасці без экзаменаў, праўда, толькі для медалістаў і пераможцаў рэспубліканскіх і міжнародных алімпіяд. Многія сустрэлі яго скептычна: маўляў, якія выдатнікі добраахвотна пойдуць у педагагічны ўніверсітэт? Аднак толькі ў менскі БДПУ імя Танка прыйшлі 65 уладальнікаў атэстата асобага ўзору, піша «Комсомольская правда в Беларуси».

«Не паступіла на «Мытную справу»- пайшла на настаўніка гісторыі»

У большасці гісторый такі сцэнар: спецыяльнасць мары - лёсавызначальнае ЦТ - педагагічны ВНУ як запасны аэрадром.

- Я збіралася на спецыяльнасць «Мытная справа» ў БелДУТ, - распавядае віцебка Ганна Алейнікава. - Здала ЦТ у мове, матэматыцы і замежнай мове, але мяне напаткала няўдача. Па рускай мове набрала 44 балы, па англійскай - 25, а па матэматыцы ўсяго 10. Таму падала дакументы ў Віцебскі дзяржаўны ўніверсітэт на «Гісторыю і грамадазнаўчыя дысцыпліны». Сама я з Віцебска, так што пастанавіла, што побач з бацькамі прывыкнуць да студэнцкага жыцця будзе прасцей. Але мары застаюцца ранейшымі. Як складзецца жыццё, не ведаю, але пакуль я схіляюся да другой вышэйшай адукацыі.

Яе зямлячка Марына Залатуха да апошняга збіралася быць юрыстам.

- Юрыстам-міжнароднікам, - папраўляе абітурыентка. - Здала тэставанне і зразумела, што балаў не стае. Хоць здала даволі добра: руская мова на 84, французская на 60, горш грамадазнаўства - 45 балаў. Таму пайшла на факультэт сацыяльнай педагогікі і псіхалогіі. Працаваць планую ў спецыяльнасці, але калі атрымаецца, то і другую вышэйшую адукацыю атрымаю.

«Паміж нялюбымі спецыяльнасцямі розніцы не бачу»

- Уступная кампанія - гэта жахлівы сон! - Жаліцца будучы біёлаг Дзмітрый Іваноўскі з Менска. – Дагэтуль не магу прыйсці ў сябе. Увесь год рыхтаваўся да паступлення, хацеў у медыцынскі - а тут узяў і заваліў ЦТ! Ды так заваліў, што адразу стала ясна: ні ў які медуніверсітэт я не праходжу. Па беларускай мове набраў 54 балы, па біялогіі 32, па хіміі 28. Селі з бацькамі, сталі думаць. Быць настаўнікам ніколі не збіраўся, але ў войска хацелася яшчэ менш. Шчыра кажучы, не разумею, навошта дзяўчаты, якія схібілі на тэстах, ідуць у пед. Маглі б дома год пасядзець, падрыхтавацца... А ў хлопцаў сітуацыя бязвыхадная. Чаму менавіта біёлаг? Таму што я не бачу асаблівай розніцы паміж нялюбымі спецыяльнасцямі. Спадзяюся, што хоць па біялогіі нядрэнную базу атрымаю. Абавязкова буду паступаць зноў у наступным годзе. А калі давядзецца адпрацоўваць размеркаванне, пайду сеяць разумнае, добрае, вечнае. Але на два гады - і ні дня больш!

Зрэшты, ёсць у шэрагах медалістаў і добраахвотнікі. Вікторыя Астапчук з Берасця адразу папярэдзіла, што яе спецыяльнасць - адна з нямногіх, якая не патрапіла ў спіс тых, дзе прымалі без іспытаў:

- Да апошняга я спадзявалася, што нічога не трэба будзе здаваць, але, мабыць, у МДЛУ на ўсе спецыяльнасці ёсць конкурс. Буду вывучаць англійскую і нямецкую мовы. Затое шмат нерваў зэканоміла: ЦТ здавала спакойна, ведала, што ў кожным выпадку не прападу: у выпадку няўдачы пайду на біяфак або «Дашкольная адукацыя».

- Кожная прафесія добрая, трэба проста свядома ставіцца да свайго выбару, - разважае Лізавета Кісялёва з Наваполацка, якая паступіла на спецыяльнасць «Дашкольная адукацыя». - У мяне ў сям'і даўно хацелі, каб хоць адна з сясцёр (а нас 4) стала педагогам, але яны выбралі іншы шлях. А калі прыйшоў час вызначацца мне, то выбар быў відавочны. ЦТ не здавала, мэтанакіравана ішла на «Дашкольную адукацыю». Я думаю, што прафесія педагога вельмі важная і патрэбная, бо менавіта ў дашкольным узросце закладваюцца ўсе асабовыя якасці нашых малых. А медаль? Медаль толькі надаў мне ўпэўненасці ў тым, што я выдатна з гэтым спраўлюся! І наогул, не месца аздабляе чалавека, а чалавек месца.