Ангела Мэркель запатрабавала хутчэйшых санкцый супраць Расеі
28- 23.07.2014, 18:33
- 37,656
Канцлерка Нямеччыны заклікала да ўвядзення супраць Расеі скарэйшых эканамічных санкцый.
Прычым, са слоў Ангелы Мэркель, зрабіць гэта трэба «як мага хутчэй», паведамляе BBC.
«Паколькі Расея не выявіла ніякай цікавасці да расследавання катастрофы самалёта, канцлерка мяркуе, што пастановы трэба прыняць хутка», - сказаў афіцыйны прадстаўнік Мэркель.
Раней прадстаўнік МЗС Нямеччыны таксама адзначаў, што Масква не прыкладае дастатковых намаганняў для пошуку праўды аб прычынах трагедыі ў небе над Данецкам.
Некаторыя прадстаўнікі ўрада Нямеччыны мяркуюць, што ў якасці адной з санкцый у Расеі варта было б адабраць права на правядзенне чэмпіянату свету ў футболе 2018 года. Аднак канцлерка гэтую ідэю не падтрымала, заявіўшы, што меры супраць Расеі павінны ляжаць у эканамічнай плашчыні.