Лукашэнкаўскі ідэолаг Гігін шукае заходні след у катастрофе «Боінга»
56- 28.07.2014, 12:33
- 20,781
Вадзім Гігін не ўважае Расею за вінаватую ў катастрофе на Данбасе.
Пра гэта ён піша ў артыкуле «Знаёмы почырк», апублікаваным на сайце БелТА.
«Жудасная катастрофа малайзійскага самалёта, якая адбылася на Украіне, шакавала. І выклікала велізарную колькасць разнастайных каментароў, па сутнасці, новы віток інфармацыйнай вайны паміж Захадам і Расеяй. Зрэшты, інфармацыі мінімум, а вось прапаганды дастаткова.
Не чакаючы хоць бы папярэдніх вынікаў міжнароднага расследавання, заходнія лідэры на самым высокім узроўні абвінавацілі ва ўсім Расею. Не будзем прытрымлівацца гэтага далёка не найлепшага прыкладу», - адзначае Вадзім Гігін.
Пасля гэтага ён падае шэраг прыкладаў з гісторыі, калі такія трагічныя падзеі выкарыстоўваліся, на ягоную думку, уладамі ЗША ў сваіх мэтах. Катастрофу «Боінга» Вадзім Гігін ставіць у адзін шэраг з імі.
«Магчыма, катастрофа малайзійскага «Боінга» сапраўды вынік жахлівай, трагічнай памылкі, выпадковасці. Магчыма... Хоць усе мы бачым, хто імкнецца атрымаць выгаду з гэтай бяды. І тое, што ўплывовыя дзяржавы, дзяржаўныя дзеячы выкарыстоўваюць гэтую трагедыю ў сваіх мэтах, у даслоўным сэнсе робяць палітыку на трупах - зусім не выпадковасць, а хутчэй фірмовы стыль, почырк, які занадта добра знаёмы. І, што самае сумнае, выключаць далейшых правакацый нельга», - падсумоўвае Гігін.
Нагадаем, у выніку катастрофы самалёта «малайзійскіх авіяліній» у Данецкай вобласці Украіны загінулі 298 чалавек - 283 пасажыры і 15 чальцоў экіпажу. Амерыканская выведка падала доказы датычнасці сепаратыстаў, якія дзейнічаюць ва Усходняй Украіне да абстрэлу «Боінга».