Лонданскі хмарачос «Агурок» выстаўлены на продаж
1- 29.07.2014, 18:02
- 11,705
Самы вядомы лонданскі хмарачос выстаўлены на продаж.
40-павярховы лонданскі хмарачос "Сэнт-Мэры Экс 30", больш вядомы як "Агурок" (the Gherkin), выстаўлены на продаж. Як чакаецца, цікавасць да яго праявяць інвестары з Кітая ды іншых краін Азіі, а таксама з ЗША.
Паводле ацэнак агенцтва нерухомасці Savills, будынак у фінансавым цэнтры Лондана можа быць прададзена за 650 млн фунтаў (1,1 млрд даляраў).
Як паведаміў BBC прадстаўнік Savills, у спецыялізаваных СМІ ўжо з'явіліся аб'явы аб продажы будынка, таксама быў створаны адмысловы інтэрнэт-сайт для рэгістрацыі патэнцыйных інвестараў.
Найбольшая цікавасць да куплі чакаецца ад кітайскіх, ганконгскіх, сінгапурскіх і амерыканскіх інвестараў.
Пасля правядзення шэрагу кантрольных мерапрыемстваў будзе адабраная альбо адна заяўка, альбо адразу некалькі. Гэта павінна здарыцца да канца верасня або да пачатку кастрычніка.
Крэдыторы перадалі "Агурок" у конкурсную ўправу пасля таго, як адзін з яго ўладальнікаў быў прызнаны банкрутам.
Нямецкая фірма IVG Immobilien, якая валодала будынкам супольна з прыватнай кампаніяй Evans Randall, абвясціла аб банкруцтве ў мінулым годзе.
Хоць Evans Randall заяўляла пра гатоўнасць набыць увесь хмарачос, ёй не ўдалося ўзгадніць свой план з IVG.
Сімвал Лондана
Будынак быў пабудаваны ў 2001-2004 гадах паводле праекту знакамітага брытанскага архітэктара сэра Нормана Фостэра. Кошт будаўніцтва склаў амаль 400 млн даляраў.
Хмарачос вышынёй у 180 метраў быў спраектаваны такім чынам, што ён спажывае удвая менш электраэнэргіі, чым іншыя пабудовы такога тыпу. У сувязі з гэтым яго часта называюць "экалагічным хмарачосам".
"Агурок" уважаецца за адзін з сімвалаў Лондана і адзін з самых вядомых узораў сучаснай архітэктуры.
У 2004 годзе праект будынка атрымаў штогадовую прэстыжную прэмію Джэймса Стырлінга, якую ўручае Каралеўскі інстытут брытанскіх архітэктараў.
У "Сэнт-Мэры Экс 30" размяшчаецца лонданская штаб-кватэра кампаніі Swiss Re, якая сёння з'яўляецца яго галоўным арандатарам.
Фота: AFP