Фотафакт: Жанна Фрыске праходзіць рэабілітацыю на Балтыцы

Упершыню за доўгія месяцы хваробы спявачка Жана Фрыске ўстала на ногі.

Пасля працяглага лячэння ў клініках Нямеччыны і ЗША спявачка разам з роднымі перабралася на Прыбалтыку. Там сям'я здымае дом у ціхай вёсачцы. З Жаннай неадлучна знаходзіцца мама Вольга Уладзіміраўна, грамадзянскі муж беларус Дзмітрый Шэпялёў і аднагадовы сын Платон, паведамляе сайт super.ru і падае фатаграфіі, якія пацвярджаюць інфармацыю.

У гэты час спявачка адпачывае ў доме ў асяроддзі блізкіх, а вечарамі ўся сям'я поўным складам выбіраецца да мора. Пакуль муж Дзіма здзяйсняе спартыўныя прабежкі на ўзбярэжжы, а за маленькім Платонам, які ўжо пачаў хадзіць, прыглядае памочніца, сама Жанна, апранутая ў зручны спартыўны касцюм, павольна ходзіць па пляжы і ажыўлена размаўляе з мамай.

Яна не цураецца людзей – у кампаніі Фрыске на пляжы часцяком мясцовыя жыхары з маленькімі дзецьмі, якія з задавальненнем гуляюць з Платонам. Тут, у ціхім прыморскім пасёлку 8 ліпеня артыстка адзначыць і своё 40-годдзе.

Лекары адзначаюць у спявачкі рэмісію. Да Жаны паступова вяртаецца зрок, часткова страчаны праз пухліну, яна прыкметна схуднела, і самае галоўнае - ўстала на ногі і ўжо можа перасоўвацца. Цяпер, пасля цяжкіх курсаў хіміятэрапіі, Фрыске трэба будзе аднаўляцца яшчэ не адзін месяц. Для праходжання рэабілітацыі спявачка разам з сям'ёй з'ехала далей ад мітусні мегаполісаў.

Аб сваім дыягназе Жанна даведалася амаль год таму ў Маямі, праз некалькі месяцаў пасля нараджэння дзіцяці. Нягледзячы на прысуд лекараў - неаперабельная пухліна мозгу - яна наважыла змагацца з цяжкай хваробай. Спачатку за яе жыццё змагаліся нямецкія медыкі, затым - найлепшыя лекары анкацэнтраў Нью-Ёрка і Лос-Анджэлеса. Увесь гэты час побач з зоркай неадлучна была яе сям'я.

Даведаўшыся пра няшчасце ў сям'і вядомай артысткі, адгукнуліся і мільёны простых людзей ва ўсёй краіне. Дзякуючы акцыі «Жанна, жыві!», ініцыяванай дабрачынная арганізацыя «Русфонд», удалося сабраць больш за 60 мільёнаў рублёў, якіх з гакам хапіла не толькі на лячэнне папулярнай спявачкі, але і на выратаванне жыцця шматлікім анкалагічна хворым дзецям з розных куткоў Расеі.